«Ես գիտնական եմ իմ մասնագիտությամբ, բայց գիտնական պետք չի լինել, որ հասկանալ՝ այս ամենի հետեւում կա պատճառահետեւանքային կապ:
Կառավարման ձեւը փոխել չի կարելի: Հենց խաղի կանոնները դառնում են խաղալիք քաղաքական վերնախավից այն կողմ՝ իշխող կուսակցության ձեռքում, դա նշանակում է, որ Սահմանադրությունը դադարում է խաղալ իր ամենակարեւոր դերը»- այսօր Ֆրիդրիխ Էբերտ հիմնադրամի հայաստանյան մասնաճյուղի կազմակերպած «Սահմանադրական բարեփոխումները Հայաստանում» խորագրով հանրային քննարկման ժամանակ իր ելույթում ասաց ՀԱԿ խմբակցության ղեկավար Լեւոն Զուրաբյանը:
Ըստ նրա, ԱՄՆ-ում 27 անգամ եղել է Սահմանադրական փոփոխություն, բայց դրանցից ոչ մեկի ժամանակ չի փոխվել կառավարման ձեւը. «Փորձենք հասկանալ Սերժ Սարգսյանի մոտիվները: Չէ՞ որ Սերժ Սարգսյանը մշտապես կողմ է եղել կիսանախագահական համակարգին: Ի՞նչ պատահեց, որ Սերժ Սարգսյանը լինելով այդ մոդելի կողմնակից, բազմիցս ասելով, որ միայն այդ մոդելն է երաշխավորում ՀՀ անվտանգությունը, իր նախագահության երկրորդ ժամկետում հանկարծ որոշեց փոխել կառավարման համակարգը:
Այդ 3 մոդելների մեջ որեւէ տարբերություն չկա դեմոկրատիայի ապահովման տեսանկյունից: Այդ երեք մոդելներն էլ Վենետիկի հանձնաժողովը համարում է հավասարապես դեմոկրատական, եթե գտնենք համապատասխան բաղադրիչները»:
Կարդացեք նաև
Նա նշեց, որ Սահմանադրական փոփոխությունների շուրջ չկա համախմբում եւ եթե իշխանությունները որպես դրա ապացույց նշում են այն, որ խորհրդարանում ընդամենը 10 պատգամավոր դեմ արտահայտվեց, դա կեղծիք է. «Ավելի մեծ կեղծիք եւ սուտ դժվար է պատկերացնել: ՀՀ ընտրական համակարգը անհուսալի կերպով կոռումպացված եւ կեղտոտված է, տեղի է ունենում 500 հազար ձայների կեղծիքներ: Այսօրվա պառլամենտը չի ներկայացնում հայ ժողովրդի կամքը»:
Նա հիշեցրեց եռյակի դաշինքը, որը ստեղծվել էր Սահմանադրական փոփոխությունները մերժելու նպատակով. «Հիշո՞ւմ եք, մենք անցյալ տարի անցկացրեցինք զանգվածային ցույցեր: Ի՞նչ եղավ՝ ցույցերից հետո Սերժ Սարգսյանը սկսեց բռնաճնշումների շարքը: Ծեծի ենթարկվեցին բազմաթիվ քաղաքական ուժերի, կուսակցությունների ներկայացուցիչներ, մեկը՝ Արամ Մանուկյանը, ԲՀԿ-ից ակտիվիստներ ծեծի ենթարկվեցին ու խոշտանգվեցին, ազատամարտիկների ծեծեցին: Իսկ գագաթնակետը եղավ այն ջարդը, որը տեղի ունեցավ, երբ Սերժ Սարգսյանը ելույթ ունեցավ եւ ասեց՝ քաղաքականությունը կրկես չի: Դիմելով Գագիկ Ծառուկյանին, ասաց՝ դուք պետք է լքեք քաղաքականությունը»:
Նա հայտարարեց, որ այդ գործընթացների ժամանակ Սերժ Սարգսյանի ելույթից հետո 500 մարդ ԲՀԿ-ից ձերբակալվել է:
Անդրադառնալով ՍԴ նախագահ Գագիկ Հարությունյանին՝ նա ասաց. «Գագիկ Հարությունյանը այն մարդն է, ում խոստացել են, որ նոր Սահմանադրության մեջ նա կունենա նախագահի պաշտոն»
Լեւոն Զուրաբյանի խոսքերով՝ իրականում այս ամենն ուղղված է Սերժ Սարգսյանի վերարտադրմանը:
Լեւոն Զուրաբյանի ելույթից հետո դահլիճում ոչ-ի ակցիա անող երիտասարդները սկսեցին բուռն ծափահարություններ:
Հռիփսիմե ՋԵԲԵՋՅԱՆ
