Ուրբաթ 2 Հոկտեմբերի առաւօտուն, Քուէյթի Ազգային Առաջնորդարանի շրջափակին մէջ տեղի ունեցաւ Հայոց Ցեղասպանութեան 100-րդ տարելիցին նուիրուած խաչքարի բացման արարողութիւնը: Խաչքարի նուիրատուն է ՀՀ պատգամաւոր եւ մեծ բարերար Գագիկ Ծառուկեան: Խաչքարի բացման արարողութեան համար Հայաստանէն ժամանած էին Ծառուկեանի մայրը ազնուափայլ Տիկին Ռոզա Ծառուկեան ընկերակցութեամբ իր դստեր՝ Տիկին Նոնա Ծառուկեանի: Այս մասին կը տեղեկացնեն Քուէյթի Ազգային առաջնորդարանէն։
Առաւօտեան Ս. եւ անման պատարագը մատուցեց եկեղեցոյ հոգեւոր հովիւ Արժ. Տ. Արտակ Քհնյ. Քէհեաեան: Դպրաց դասը ղեկավարեց դպրապետ՝ Քեռի Սարգիսեան: Պատարագին ներկայ գտնուեցան ՀՀ արտակարգ եւ լիազօր Դեսպան Ֆատէյ Չարչօղլեան, Թեմի երեսփոխանական ժողովի եւ ազգաին վարչութեան անդամները, գաղութիս մէջ գործող բոլոր միութեանական մարմինները եւ մեծ թիւով հաւատացեալներ: Պատարագի աւարտին Հայաստանի Հանրապետութեան վերանկախացման 24-րդ տարեդարձին առթիւ տեղի ունեցաւ դրօշակի արարողութիւն ապա հոգեհանգիստ ազգի նահատակ հերոսներուն համար: Աւարտին Թեմիս Առաջնորդ՝ Գերպ. Տ. Մասիս Ծ. Վրդ. Զօպուեան փոխանցեց օրուայ պատգամը: Ան նախ ՀՀ վերանկախութեան առթիւ Հայրենիքի բարգաւաճման ու առաւել հզօրացման իր մաղթանքները կատարեց, նշելով որ, հակառակ բոլոր դժուարութիւններուն երբէք չընկճուեցաւ հայու ազատատենչ ոգին, եւ շնորհիւ հայ ժողովուրդի աննկուն կամքին ան շարունակեց տոկալ հայրենիքի ու պետութեան իր պայքարին մէջ: Ապա Հայր Սուրբը բարի գալուստ մաղթեց Տիկ. Ռոզա Ծառուկեանին եւ յիշեց Գագիկ Ծառուկեանի 2014 Ապրիլին Քուէյթ կատարած ճամբորդութիւնը, երբ այցելած էր Ազգային Առաջնորդարան եւ Ազգային Վարժարան եւ մեծ տպաւորութիւններով վերադարձած: Հայոց Ցեղասպանութեան 100-րդ տարելիցին առիթով զետեղուած խաչքարը խորհրդանիշ պիտի դառնայ Հայաստան-Սփիւռք անխզելի կապին եւ հայ ժողովուրդի միասնականութեան, շեշտեց Հայր Սուրբը, վեր առնելով Ծառուկեան գերդաստանի հայրենանուէր ու եկեղեցանուէր բարեգործական աշխատանքները:
Պատարագի աւարտին Առաջնորդարանի շրջափակէն ներս նախ բարձրացուեցաւ հայոց երագոյն դրօշը եւ ապա տեղի ունեցաւ խաչքարի բացման արարողութիւնը մինչ Հայաստանի քայլերգով հանդէս եկաւ Հ.Մ.Ը.Մ.ի շեփորախումբը երէց սկաուտներու ներկայութեամբ: Բացման արարողութենէն ետք Տիկ. Ռոզա Ծառուկեան արտասանեց իր խօսքը: Ան ըսաւ «Այսօր մենք բոլորս այստեղ հավաքվել ենք հրաշալի մի առիթով՝ արաբական աշխարհում եւ արաբական հողի վրա վեր է խոյանում մեր ազգային ինքնությունն ու դիմագիծը հավերժացնող սրբակերտ այս խաչքարը» (խօսքը կցեալ նկարներու շարքին): Ապա Հայր Սուրբն ու թեմական ժողովի ատենապետ՝ տիար Յարութիւն Պետիրեան եւ ազգային վարչութեան ատենապետ՝ Տիար Մունիր Դարբինեան յուշանուէր մը փոխանցեցին Տիկին Ծառուկեանին, որուն անձնական փափաքով ու նուիրատութեամբ Պատարագի աւարտին կատարուեցաւ մատաղի օրհնութիւն պատրաստուած եկեղեցասէր տիկնանց յանձնախումբին կողմէ:
Անցնող օրերուն Հայաստանէն ժամանած պատուոյ հիւրերը այցելեցին ՀՀ. Դեսպանութիւն, մասնակցեցան ՀՀ վերանկախացման 24-րդ տարեդարձի նշման ընդունելութեան, հանդիպեցան Թեմական ժողովի անդամներուն, ազգային վարչութեան եւ ազգաին վարժարանի հոգաբարձութեան հետ: Նախաճաշի հիւրերը եղան զանազան մարմինները ներկայացնող հայ տիկիններու: Անոնք Կիրակի 4 Հոկտեմբերին այցելեցին Ազգաին Վարժարան: (Ազգաին Վարժարան այցելուլթեան մանրամասնութիւնները կարդալ facebook-ի Քուէյթի Ազգային Վարժարան էջին վրայ):
