Այսօր տեղեկություններ տարածվեցին այն մասին, որ Ավետիսյանների 7 հոգանոց ընտանիքի դաժան սպանության մեջ մեղադրվող Վալերի Պերմյակովի դատահոգեբանական–դատահոգեբուժական փորձաքննության եզրակացությունը ստացվել է: Հիշեցնենք, որ նման փորձաքննություն կատարելու միջնորդություն ներկայացրել էին Ավետիսյանների փաստաբանները, քանի որ օգոստոսի 12-ին Գյումրիի 102-րդ ռազմաբազայի տարածքում Հյուսիսկովկասյան օկրուգի զինվորական դատարանում զենքով դասալքության, զինամթերք հափշտակելու եւ ապօրինի զենք կրելու համար դատվող Պերմյակովի վարքագիծը տարօրինակ էր թվացել: Նա դատավարության ընթացքում մերթընդմերթ քնում էր, հեռուստաընկերություններից մեկի միկրոֆոնը վայր ընկավ, բոլորը վախեցած նայեցին, թե ինչ կատարվեց, իսկ ամբաստանյալը անգամ շուռ չեկավ նայելու, թե ինչ աղմուկ էր, իսկ վճիռը հրապարակելիս նա սկսեց հրճվել, ժպտալ:
Aravot.am-ը դիմեց Ավետիսյանների փաստաբաններին՝ փորձելով ճշտել տեղեկությունը, թե արդյո՞ք Վալերի Պերմյակովի դատահոգեբանական–դատահոգեբուժական փորձաքննության եզրակացությունը ստացվել է ու խնդրելով մանրամասնել, թե ի՞նչ է գրված եզրակացության մեջ: Ճանաչված փաստաբաններ Լուսինե Սահակյանն ու Երվանդ Վարոսյանը մեզ հետ ունեցած հեռախոսազրույցում ընդամենն ասացին, որ շուտով հանդես կգան մամուլի ասուլիսով:
Նունե ԱՐԵՎՇԱՏՅԱՆ
