Ձեւավորվել է «Նոր Հայաստան» հանրային փրկության ճակատը: Ճակատն ունի միասնական շտաբ: Խորհրդի կազմում են Րաֆֆի Հովհաննիսյանը, Ժիրայր Սեֆիլյանը, Հմայակ Հովհաննիսյանը, Պետրոս Մակեյանը, Անդրեաս Ղուկասյանը, Գարեգին Չուքասզյանը եւ Արմեն Մարտիրոսյանը:
Այս մասին այսօր հրավիրած ասուլիսում ասաց «Ժառանգության» փոխնախագահ Արմեն Մարտիրոսյանը:
Ասուլիսին պետք է մասնակցեր նաեւ Րաֆֆի Հովհաննիսյանը, բայց նա նախօրեին ընտանեկան ինչ-որ հրատապ հարցերի պատճառով մեկնել է հանրապետությունից:
Ուստի Արմեն Մարտիրոսյանը միայն կարդաց Րաֆֆի Հովհաննիսյանի ուղերձը, որտեղ մասնավորապես ասվում էր, որ գուբերնիա սարքելու այս ինքնահավան ձեռնարկը մերժում է:
Կարդացեք նաև
Արմեն Մարտիրոսյանը նշեց, որ իրենց նպատակն է հեռացնել Սերժ Սարգսյանին, անցկացնել Երեւանում հանրապետական հանրահավաք. «Հայաստանում առկա են խորը քաղաքական, սոցիալական, տնտեսական խնդիրներ, որոնք ունեն երկրի անվտանգության վրա ազդող մեծ նշանակություն: Մենք այդ խնդիրները պետք է անպայման լուծենք: Ունենք համատարած կոռուպցիա, համակարգային կոռուպցիա: ՀՀ-ն վերջին ժամանակահատվածում ոչ լեգիտիմ իշխանություն ունենալու պատճառով կորցրել է ինքնիշխան որոշումներ կայացնելու կարողությունը:
Ժիրայր Սեֆիլյանի խոսքերով՝ «Մենք այսօր 7 հոգով ենք: Պիտի լինի կոլեգիալ որոշում»:
Նա ասաց, որ մտադիր են ընդգրկել իրենց խմբում Ստեփան Դեմիրճյանին, ՀԱԿ-ից ներկայացուցիչներ եւ Նիկոլ Փաշինյանին. «Մտադիր ենք ընդգրկել գործիչների, որոնք վճռական տրամադրված կլինեն Սահմանադրական հանրաքվեի առիթն օգտագործել, միավորել բոլորիս ռեսուրսը, ժողովրդին ոտքի հանել եւ ձերբազատվել այս իշխանությունից»:
Հռիփսիմե ՋԵԲԵՋՅԱՆ
