Aravot.am-ի հետ զրույցում մեկնաբանելով քաղաքապետարանի բյուջեի հաշվին որոշ մարդկանց բնակարաններ նվիրելը եւ Հրանտ Թոխատյանի այն արտահայտությունը, թե Երեւանի տոնը նշելու ենք եւ չուզողի աչքն էլ հանելու ենք , հայագետ, լեզվաբան Դավիթ Գյուրջինյանն ասաց. «Քաղաքային կյանքի վերջին իրադարձություններն ու դրանց մեկնաբանությունները հստակորեն ցույց են տալիս, որ նկատելի և խոր անջրպետ է գոյացել «մեր» և «իրենց» միջև: «Իրենք»` այսօրվա իշխանավորներն ու նրանց սազանդարներն են գոյացրել այդ անջրպետն իրենց փայփայած, բայց ընդամենը խորհրդային մնացուկ ու արդեն անիմաստ դարձած պատվավոր կոչումների և տիտղոսների միջոցով, հասարակության հաշվին յուրայիններին տրվող ճոխ նվերներով և ամենազոր ներկայանալու իրենց կեցվածքով:
Եվ օրեցօր ավելի ու ավելի են խորացնում հասարակության մեջ գոյացած այդ վիհը, երբ հաշվի չեն նստում հանրային կարծիքի հետ, երբ քամահրական վերաբերմունք են դրսևորում այլ կարծիք ունեցողների նկատմամբ…
«Իրենք» հավերժության մասին սխալ պատկերացումներ ունեն. պարզամտորեն կարծում են, թե հավերժական ու անխախտ են իրենց աթոռներն ու դերերը: Այնինչ սթափվելու ժամանակն է: Երկիրն օրհասական վիճակում է, մեզ մանր-մունր հարցերով են զբաղեցնում»:
Գոհար ՀԱԿՈԲՅԱՆ
Կարդացեք նաև
