ԱԺ ֆինանսավարկային եւ բյուջետային հարցերի մշտական հանձնաժողովի նախագահ Գագիկ Մինասյանի կանխատեսմամբ, 2016 թվականին Հայաստանը կունենա 2.2 տոկոս տնտեսական աճ:
Նա այսօր «Փաստարկ» ակումբում ասաց, որ բյուջեով նախատեսված է 2-2,5 տոկոս աճ. «Գնաճի ցուցանիշը մենք շարունակում ենք պահել 4 պլյուս մինուս 1,5 տոկոսի սահմաններում, իսկ բյուջեի պակասորդը նախատեսվում է մինչև 3,5 տոկոսի միջակայքում, իսկ մեր բյուջեի մուտքերը ավելանալու են մոտ 70 միլիարդ դրամով»;
Պարոն Մինասյանի խոսքով, բյուջեն կազմում են՝ ելնելով իրատեսական և աշխարհում առկա իրողություններից.
«Կանխատեսումներ անելիս պետք է ուշադրության արժանացնենք այն իրողությունները, որոնք առկա են մեր տնտեսական բնագավառում մեր առավել համագործակցություն ունեցող երկրների տեսակետից: Առաջին հերթին ԵՏՄ երկրների տնտեսություններին պետք է ուշադրություն դարձնել, հատկապես Ռուսաստանում տեղի ունեցող զարգացումներին: ՌԴ տնտեսական զարգացումը, ըստ միջազգային կառույցների, լինելու է 0.2 տոկոս: ԵՄ գործընկերների մոտ նույնպես տնտեսական աճի կանխատեսումները համեստ են»:
Կարդացեք նաև
Պարոն Մինասյանը չհերքեց, որ Ռուսաստանում տեղի ունեցող իրադարձություններն ազդում են Հայաստանի տնտեսության վրա եւ ասաց, որ Համաշխարհային բանկի կանխատեսմամբ, Ռուսաստանում տնտեսական աճը 0,20,7 տոկոս կլինի. «Ռուսաստանում առկա են ապրանքների իրացման դժվարություններ, ինչն ազդում է նաև մեր արտահանողների վրա, իսկ դա մեղմելու համար մենք արտահանման հետ կապված որոշակի արտոնություններ տրամադրեցինք բիզնես ոլորտի ներկայացուցիչներին»:
Արփինե ՍԻՄՈՆՅԱՆ
