«Նման լուրջ սպառնալիքների դեպքում, մենք պետք է պատրաստ լինենք ցանկացած զարգացումների»,- հոկտեմբերի 9-ին «Նոյյան տապան» մամուլի ակումբում լրագրողների հետ հանդիպման ժամանակ ասաց «Հայրենյաց պաշտպանների միություն» հասարակական կազմակերպության անդամ, ԶՈՒ գնդապետ Վալերի Վարդանյանը:
«Հայրենյաց պաշտպանների միություն» հասարակական կազմակերպությունը նոր է ստեղծվել, սպաների միություն է, որը կփորձի համախմբել ողջ ներուժը, բարձրացնել ժողովրդի զգոնությունը, կազմակերպչական ունակությունները եւ ինքնապաշտպանական ոգին:
«Վերջին շրջանում տարածաշրջանում վիճակը լարվել է, հատկապես՝ Սիրիայում պատժիչ գործողությունների արդյունքում Իսլամական պետության գրոհայինները ապաստանել են բոլորովին մեր սահմաններին մոտ՝ Թուրքիայի տարածքում, եւ այնտեղ կուտակումներ կան: Սա ոչ միայն անմիջական վտանգ է տարածաշրջանի պետությունների եւ հատկապես՝ մեր համար, այդ իսկ պատճառով մենք՝ պահեստազորի սպաներս, այսինքն՝ պաշտպանության, ազգային անվտանգության եւ ներքին գործերի մարմնի պահեստազորի սպաներս որոշեցինք ստեղծել միություն, համալրել եւ համախմբել ողջ մեր ներուժը, որպեսզի կարողանանք դիմակայել այդ մարտահրավերներին, հատկապես՝ մենք շատ մտահոգ ենք նման լարված իրավիճակից եւ լի ենք վճռականությամբ՝ պաշտպանել մեր ինքնությունը եւ սահմանների անվտանգությունը»,- ասաց Վալերի Վարդանյանը:
Ասուլիսի ընթացքում նա ընթերցեց նաեւ «Հայրենյաց պաշտպանների միության» հայտարարությունը, որով հասարակական կազմակերպության անդամները կոչ են անում մտահոգ քաղաքացիներին ինքնակազմակերպվել, որպեսզի միասնական ճակատով դիմակայեն սպառնացող մարտահրավերներին, արժեւորեն սեփական ինքնությունը եւ զերծ պահեն Հայաստանին ժողովրդին խորթ հոգեբանական, գաղափարական ներազդություններից:
Կարդացեք նաև
Ամի ՉԻՉԱԿՅԱՆ
Լուսանկարը՝ «Նոյյան տապանի»:
