Նորվեգիայի Նոբելյան հանձնաժողովը որոշել է, որ 2015 թվականի Խաղաղության Նոբելյան մրցանակը պետք է շնորհվի Թունիսի ազգային երկխոսություն քառյակին, քանի որ վերջինս մեծ ավանդ է ունեցել 2011 թվականի հեղափոխության արդյունքում Թունիսում բազմակարծիք ժողովրդավարություն ստեղծելու գործում:
Nobelprize.org կայքում հրապարակված հաղորդագրությունում նշված է, որ Քառյակը ձեւավորվել է 2013 թվականի ամռանը, երբ ժողովրդավարացման գործընթացը վտանգի տակ էր, քանի որ երկրում քաղաքական սպանություններ եւ սոցիալական բողոքի ցույցեր էին տեղի ունենում: Այն հաստատեց այլընտրանքային, խաղաղ քաղաքական գործընթաց մի ժամանակ, երբ երկիրը քաղաքացիական պատերազմի նախաշեմին էր:
Այդպիսով Քառյակը գործիք դարձավ Թունիսում մի քանի տարիների ընթացքում կառավարման սահմանադրական կարգ հաստատելուն, որը երաշխավորում է ողջ բնակչության հիմնարար իրավունքները, անկախ սեռից, քաղաքական հայացքներից եւ կրոնական հավատից:
Թունիսի ազգային երկխոսություն քառյակը կազմված է 4 հասարակական կազմակերպություններից. Թունիսի գլխավոր աշխատանքային միավորում, Թունիսի արդյունաբերության, առեւտրի եւ արհեստների կոնֆեդերացիա, Թունիսի մարդու իրավունքների լիգա եւ Թունիսի իրավաբանների օրդեն: Այս կազմակերպությունները ներկայացնում են Թունիսի հասարակության տարբեր հատվածները եւ արժեքները:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
