«Դաշնակցությունը խորհրդարանական հանրապետությունը վերածելով դիկտատուրայի՝ մի անգամ կործանեց հայոց պետականությունը, գիտես ինչու, հիմա նորից կառչում է այդ նույն կառավարման մոդելին: Մեկին ծեծելով, մեկին կաշառելով, ինչ-ինչ քաղաքական հեռանկարներով հիմա բերել են այս ճամբար: Հակառակ ճակատում՝ բարիկադի մյուս կողմում, բացի ոչ-ի ճակատից, գտնվում է մեր ամբողջ հանրությունը»,- ԱԺ ճեպազրույցների ժամանակ ասաց ՀԱԿ խմբակցության ղեկավար Լեւոն Զուրաբյանը:
Ըստ նրա, փաստաբանները, անգամ բնապահպանները Սահմանադրական փոփոխություններին դեմ են, որեւէ աջակցություն հանրության մեջ այդ նախաձեռնությունը չունի:
Լեւոն Զուրաբյանն ասաց, որ ընտրարշավների կազմակերպման փորձ ունեն եւ հիմա բանակցություններ կսկսեն «ոչ»-ի ճակատի այլ քաղաքական ուժերի հետ՝ ռեսուրսների միավորման համար:
Հարցին՝ Ռոբերտ Քոչարյանը նույնպես ոչ է ասել, հնարավո՞ր է միավորվեք՝ նա ասաց, որ դա իշխանության կողմից է ներդրված, որ «ոչ»-ի ճակատում այս առնչությամբ սկսեն խայթոցներ իրար նկատմամբ. «Ռոբերտ Քոչարյանն այսօր չկա քաղաքական դաշտում որպես գործոն եւ քաղաքական ուժ: Այսօր քաղաքական դաշտում կա իշխանությունը եւ «ոչ»-ի ճակատը, ուրիշ ոչ մեկը չկա»:
Կարդացեք նաև
«Մի բան հարցնեմ՝ ո՞վ է ձեզանից կողմ, որ այս Սահմանադրական փոփոխությունները անցնեն: Խնդրում եմ ձեռք բարձրացրեք, ով է կողմ»,- այսպես Լեւոն Զուրաբյանը փորձեց քվեարկություն անցկացնել ասուլիսին ներկա լրագրողների շրջանում:
Լրագրողները աղմուկ բարձրացրեցին՝ մեզ մանիպուլյացիայի մի ենթարկենք, մենք այստեղ ենք ձեր դիրքորոշումն իմանալու: Լրագրողներից մեկը ձեռք բարձրացրեց, որ դեմ է, մյուսներն ասացին, որ գաղտնիք է:
Զուրաբյանն ասաց, որ հանրության շրջանում այսպես հարցումներ է անում եւ արձանագրում, որ իրականում ոչ ոք կողմ չէ. «Արձանագրենք, որ ոչ մեկը այս դահլիճում կողմի համար ձեռք չբարձրացրեց»:
Հռիփսիմե ՋԵԲԵՋՅԱՆ
