«Մենք վստահ ենք, որ ունենալու ենք լուրջ եւ մեծ ներկայացվածություն՝ ապագա խորհրդարանում»,- այսօր ԱԺ ճեպազրույցների ժամանակ հայտարարեց ՕԵԿ պատգամավոր Մհեր Շահգելդյանը:
Հարցին՝ ինչո՞ւ եք այդքան վստահ, ձեզ ինչ-որ խոստումնե՞ր են տվել՝ նա պատասխանեց՝ խոստումներով մենք երբեք քաղաքականություն չենք իրականացրել: Ժողովուրդը ում ինչքան ձայն կտա՝ այնքան էլ ներկայացվածություն կունենան խորհրդարանում: Մեր ընտրազանգվածը կայուն է եւ մեր աշխատանքները թույլ են տալիս ասելու, որ մենք լուրջ ներկայացվածություն ենք ունենալու: Մենք ձեւավորում ենք ճակատ՝ «Հայկական վերածնունդ»: Մեր մոտեցումները կլինեն, մենք հստակ աշխատելու ենք: Մենք միանշանակ կողմ չենք Սահմանադրական փոփոխություններին»:
Լրագրողների դիտարկմանը, որ ՕԵԿ-ը կապվում էր մուրաբա բաժանելու հետ, դրա՞ համար եք փոխել ձեր անունը եւ դարձրել «Հայկական վերածնունդ»՝ այդ պիտակից ազատվելու համար՝ Մհեր Շահգելդյանը պատասխանեց. «ՕԵԿ անունը մուրաբա բաժանելու հետ չի կապվում: Չեմ հասկանում, դուք կողմ չե՞ք, որ ուժեր միավորվեն եւ փորձեն համատեղ լուծումներ գտնել»:
Միջանցքում ՀԱԿ խմբակցության ղեկավար Լեւոն Զուրաբյանը Շահգելդյանին բարեւելով՝ հարցրեց. «Հիմա չհասկացանք՝ դուք ո՞չ եք, թե՞ այո եք»:
Կարդացեք նաև
Շահգելդյանը ծիծաղեց՝ «Մամուլից կիմանաք»:
Հռիփսիմե ՋԵԲԵՋՅԱՆ
