Արդեն տեղեկացրել ենք, որ օրերս Իսրայելի ԱԳՆ-ն հաղորդագրություն է տարածել այն մասին, որ ՑԱԽԱԼԱ-ի բանակի զինծառայողը, որը գտնվում է արձակուրդի մեջ, եկել է Հայաստան եւ չի կարողանում վերադառնալ: Նշված է նաեւ, որ նա փոքր տարիքում ծնողների հետ լքել է Հայաստանը եւ հրաժարվել Հայաստանի քաղաքացիությունից: Այժմ Հայաստանում պնդում են, որ նա պետք է ծառայի ՀՀ զինված ուժերում:
Այս առնչությամբ Aravot.am-ը մեկնաբանություն խնդրեց ՀՀ արտաքին գործերի նախարարի մամուլի քարտուղար Տիգրան Բալայանից: Նա ասաց, որ ՀՀ ոստիկանության անձնագրային և վիզաների վարչությունից ստացված գրության համաձայն, Արա Վահագնի Մարտոյանը (ծնվ. 11.03.1995թ.) 01.11.2000թ.-ին ստացել է ՀՀ քաղաքացու անձնագիր:
«Ա. Մարտոյանը ՀՀ Կառավարության 23.11.2007թ.-ի թիվ 1390-Ն որոշմամբ սահմանված կարգով մինչ օրս չի դիմել ՀՀ քաղաքացիությունը դադարեցնելու համար»,- նշեց պարոն Բալայանը:
Նա նաեւ տեղեկացրեց, որ ՀՀ զինվորական կոմիսարից ստացված գրության համաձայն` Ա. Մարտոյանը «Զինապարտության մասին» ՀՀ օրենքի 3.1 հոդվածի ուժով ենթակա է զորակոչի պարտադիր զինվորական ծառայության ՀՀ զինված ուժերում, քանի որ նա ունի պարտադիր զինվորական ծառայություն անցնելու չկատարված պարտավորություն:
Կարդացեք նաև
«Միաժամանակ, տեղեկացնում ենք, որ Վրաստանում Իսրայելի դեսպանությունը 03.09.2015թ.-ի հայտագրով դիմել է Վրաստանում ՀՀ դեսպանությանը` փոխանցելով Իսրայելի պաշտպանության նախարարության նամակը` այն մասին, որ Ա. Մարտոյանը հանդիսանում է Իսրայելի պաշտպանության ուժերի զինծառայող և խնդրել է ՀՀ իրավասու մարմինների աջակցությունը` Ա. Մարտոյանի Իսրայել վերադառնալու հարցում»,- եզրափակեց ՀՀ ԱԳ նախարարի մամուլի քարտուղարը:
Աշոտ ԻՍՐԱԵԼՅԱՆ
Լուսանկարը՝ Տիգրան ԲԱԼԱՅԱՆԻ ֆեյսբուքյան էջից
Կիսեք 2 երկրների մեջ