Այս պահին ընթանում է Երևանյան 20-րդ միջազգային խորհրդաժողովը՝ նվիրված ՀՀ Սահմանադրության ընդունման 20-ամյակին եւ ՀՀ սահմանադրական դատարանի ստեղծման 20-ամյակին: Կազմակերպիչներն են ՀՀ սահմանադրական դատարանը, Վենետիկի Հանձնաժողովը, Նոր ժողովրդավարության երկրների սահմանադրական վերահսկողության մարմինների Կոնֆերանսը, ՀՀ սահմանադրական իրավունքի կենտրոնը:
Թեև խորհրդաժողովը բավականին ծանրակշիռ ներկայացվածություն ունի հատկապես արտերկրից հրավիրված հյուրերի առումով, այստեղ են Լատվիայի, ՌԴ-ի, Չեխիայի և այլ երկրիների ՍԴ նախագահներ և ներկայացուցիչներ, սակայն հայերեն համաժամանակյա թարգմանություն ապահովված չէ:
Լրագրողներն իրենց վրդովմունքը հայտնեցին այս առիթով: Ի պատասխան այս մտահոգության՝ ՍԴ աշխատակազմի ղեկավար Առուշան Հակոբյանը հայտարարեց, թե ի՞նչ է պատահել, այնպես չէ, որ այստեղ հայերեն խոսք չի հնչում, օրինակ՝ Գագիկ Հարությունյանն է հայերեն խոսել, Արփինե Հովհաննիսյանը, շուտով Արևիկ Պետրոսյանը հայերեն ելույթ կունենա:
Կարդացեք նաև
Այն հստակեցմանը, թե խոսքը հայերեն թարգմանության մասին է, պարոն Հակոբյանը արդարացավ, թե հինգից ավելի ալիքի թարգմանության հնարավորություն իրենք չունեին, մինչդեռ ընդամենը երեք թարգմանիչներ էին ներկա: Այս վրդովմունքից հետո ժամանակավոր կերպով վերականգնվեց հայերեն թարգմանությունը, այն էլ ռուսերենից հայերեն:
Սակայն հարցը այդպես էլ մնաց չլուծված:
Տաթև ՀԱՐՈՒԹՅՈՒՆՅԱՆ
