Թուրքագետ Հակոբ Չաքրյանը համոզված է, որ Ռուսաստան, Իրան, Իրաք ձևավորված առանցքը շուտով հաջողության կհասնի: Այս մասին այսօր լրագրողների հետ հանդիպման ժամանակ ասաց թուրքագետը:
«Ամեն բան արդեն պարզ է, Ռուսաստանը հաղթանակ է գրանցում Իսլամական պետության դեմ պայքարում: Մի քանի օր ժամանակ է տվել ահաբեկիչներին և վճռական է նրանց ոչնչացնելու հարցում: Պուտինն ինքը հայտարարեց՝ որ քաղաքն ազատագրեն, այնտեղ կոչնչացնեն ահաբեկիչներին»:
Հակոբ Չաքրյանի կանխատեսմամբ՝ 3-4 ամիս հետո Ռուսաստանը հաջողություն կգրանցի Սիրիայում:
«Թուրքական քաղաքականությունը Սիրիայում ձախողվել է, և Թուրքիան Սիրիայում դիրքերն ամրապնդելու բոլոր հույսերն աստիճանաբար կորցնում է»,- կարծում է թուրքագետը:
Կարդացեք նաև
Նրա դիտարկմամբ՝ Թուրքիան սխալը սխալի հետևից է անում և «անմիտ» հայտարարություններով միմիայն խայտառակում է իրեն. «ՌԴ ինքնաթիռի կողմից Թուրքիայի օդային տարածքը խախտելուց հետո Թուրքիան, ի դեմս Դավութօղլուի, շատ կտրուկ հայտարարությամբ հանդես եկավ և հայտնվեց ծիծաղելի ու հիմար դրության մեջ»:
Հիշեցնենք, որ պաշտոնական Անկարան հայտարարել էր, թե կհարվածի Թուրքիայի օդային տարածքը խախտած ինքնաթիռին, եթե ևս մեկ անգամ դա կրկնվի: Սակայն այդ հայտարարությունից անմիջապես հետո գրանցվեց ևս մեկը, ի պատասխան որի Անկարան ոչինչ չարեց:
«Նախընտրական շրջան է, ասլան էր կտրել: Թուրքիան այն պետությունը չէ, որ կարողանա Ռուսաստանի հետ մրցակցել: Ռուսաստանի դեմ չի կարող խաղալ»,- համոզմունք հայտնեց բանախոսը:
Ի դեպ, Թուրքիայում առաջիկայում կայանալիք խորհրդարանական ընտրությունների մասին:
Հ. Չաքրյանը կարծում է, որ Էրդողանի «Արդարություն և զարգացում» կուսակցությունը կհաղթի այդ ընտրություններում, բայց միանձնյա իշխանության հասնելու համար անհրաժեշտ 276 տեղը խորհրդարանում չի ապահովի:
Սիրանուշ ՀԱՅՐԱՊԵՏՅԱՆ
