Այսօր Էրեբունի եւ Նուբարաշեն վարչական շրջանների ընդհանուր իրավասության դատարանում (նախագահող դատավոր Վլադիմիր Գրիգորյան) «օֆշորի գործով» դատական նիստին ներկա չէին տուժող Փայլակ Հայրապետյանը, նրա ներկայացուցիչ Ինգա Ավագյանը:
Փայլակ Հայրապետյանի ներկայացուցիչ Շալիկո Փիրուզյանը տեղեկացրեց, որ պարոն Հայրապետյանը չի ներկայացել դատարան, քանի որ ընկել է իր տանը և վնասվածք ստացել:
Իսկ Ինգա Ավագյանը դատարանին գրավոր դիմում էր ներկայացրել, որով տեղեկացնում էր, որ Փաստաբանների պալատում մասնակցում է որակավորման քննությունների ու խնդրում է, որպեսզի դատական նիստը հետաձգվի, քանի որ ապացույցների ուսումնասիրման հետ կապված պետք է ներկայացնի մի շարք միջնորդություններ, ուստի իր բացակայության պայմաններում դատական նիստը շարունակելու դեպքում հնարավորություն չի ունենա լիովին իրականացնել իր վստահորդի շահերի պաշտպանությունը:
Կարդացեք նաև
Դատական նիստը չկայացավ, քանի որ նախագահող դատավորը կարծիք հայտնեց, որ ապացույցների հետազոտման փուլում Փայլակ Հայրապետյանի և Ինգա Ավագյանի մասնակցությունը պարտադիր պայման է:
Հաջորդ դատական նիստը կկայանա 2015-ի հոկտեմբերի 22-ին՝ ժամը 12-ին:
Տաթև ՀԱՐՈՒԹՅՈՒՆՅԱՆ
