«Երեկ դուք իմ հարցին պատասխանելիս մի քանի անգամ ասացիք`երեւի ուշադիր չեք»,- երեկ`իր հարցին Հանրայի հեռուստաընկերության խորհրդի նախագահ Ռուբեն Ջաղինյանի պատասխանին արձագանքելով՝ իր ելույթը սկսեց ընդդիմադիր պատգամավոր Տիգրան Ուրիխանյանը:
Պատգամավորը երեկ գնացել ու ուշադիր նայել է Հանրայինի լրատվական ծրագիրը ու այսօր հեգնեց. «Ասել էին՝ պատգամավոր կա, որ չորրորդ տարին է՝ գործունեություն է ծավալում, ոչ մի վայրկյան լուսաբանում չի եղել, գոնե էդ ցույց տայիք, որ հակասություն գտնեիք խոսքումս»:
Տիգրան Ուրիխանյանը կարծում է, որ իշխանության սեղմած կոճակի արդյունքում է Հանրայինն աշխատում, հետեւաբար, ընդդիմադիր հասարակական-քաղաքական գործունեություն իրականացնող պատգամավորները «միամիտ դուրս» են մնում Հանրայինի տեսախցիկների ուշադրությունից: «Փողը ստանում է հանրությունից, կատարում է իշխանության պատվերը»,- ասաց նա`հավելելով, որ այդ իսկ պատճառով իր բոլոր ասածները իշխանության հասցեին են:
«Ինֆորմացիոն բլոկադան իննսունականների ոճ է: Դուք չգիտե՞ք, որ այսօր գոյություն ունի համացանց, իմաստը ո՞րն է»,- հռետորական հարց հնչեցրեց պատգամավորը:
Կարդացեք նաև
Նա անդրադարձավ մշակութային ծրագրերին էլ, որոնց մասին պատգամավորները հիմնականում դրվատանքով էին խոսում:
«Ուզում եք ասել, որ տաղանդավոր երեխայի համար, որը գումար չունի, Հանրային հեռուստաընկերության ճանապարհները բա՞ց են»,- տարակուսեց Տիգրան Ուրիխանյանը`հետաքրքրվելով`բա ինչո՞ւ են անընդհատ նույն դեմքերը երգում, պարում:
Իր խոսքի վերջում, նա ընդհանրական նկատեց. «Անարդյունավետ կառավարման բացակայությունը, կառավարողներին փոխելու սարսափից է, որ այդ կերպ եք աշխատում»: Ու մեջբերեց Վուդի Ալենին, ով ասել էր. «Լոս Անջելեսում վաղուց գործարանները աղբ չեն վերամշակում, դրանով զբաղվում է հեռուստաընկերությունը»:
Ինֆորմացիոն բլոկադայի մասով էլ ասաց, որ հայտնի է`արգելված պտուղը քաղցր է ու մարդկանց հետաքրքրությունը դրանից կրկնապատկվում է:
Նելլի ԳՐԻԳՈՐՅԱՆ
