Այսօր Էջմիածնի հիմնադրման 2700-ամյակի տոնական միջոցառումների սկիզբն ազդարարվեց Վազգեն Սարգսյան փողոցում` Սպարապետի հուշարձանի բացման արարողությամբ: Միջոցառմանը ներկա էին հանրապետության բարձրաստիճան այրերը` ՀՀ նախագահ Ս.Սարգսյանը, Ամենայն հայոց կաթողիկոս Ն.Ս.Օ.Տ.Տ Գարեգին Երկրորդը, Ազգային ժողովի նախագահ Գ.Սահակյանը,պատգամավորներ` Մ. Գրիգորյանը և Ս. Սանոյանը, քաղաքային իշխանության ներկայացուցիչներ: Արարողության պատվավոր հյուրերն էին Վազգեն Սարգսյանի ընտանիքի անդամները`Գրետա և Զավեն Սարգսյանները, սպարապետի եղբայրները`Արամ և Արմեն Սարգսյանները: Հուշարձանի բացումը կատարեց Արմեն Սարգսյանը:
Aravot.am-ի հարցին, թե ինչպես որոշվեց Սպարապետի կիսանդրին տեղադրել նրա անունը կրող փողոցում`Ազգային ժողովի պատգամավոր, գեներալ Մանվել Գրիգորյանը պատասխանեց. «Շնորհավորում եմ համաքաղաքացիներիս Էջմիածնի տոնի առթիվ: Ցանկանում եմ ավելի բարեկեցիկ կյանք, իսկ թե ինչու որոշեցինք` մեր Վազգենն ա, բա ինչ պիտի անեինք»:
Կարդացեք նաև
Մեր զրույցում հուշարձանի հեղինակ- քանդակագործ Ռուբեն Նալբանդյանը մասնավորապես ասաց, որ կարճ ժամանակում`մոտ երկու ամսվա ընթացքում գլուխ է բերվել քանդակը. «Սա բավականին բարդ աշխատանք էր, բայց մենք կարողացանք հասցնել` ժամանակի մեջ տեղավորվելով:
Վ.Սարգսյան փողոցում տեղադրված կիսանդրին առիթ հանդիսացավ,որպեսզի բարեկարգվի փողոցը` ստանալով ավելի ներկայանալի տեսք: Կիսանդրին բրոնզ է, իսկ ներքևի հատվածը ընտրեցինք տուֆը, քանի որ այն հայության խորհրդանիշն է: Կարող էինք նաև բազալտից կառուցել: Կիսանդրին շրջապատված է չորս սյուներով, որոնք խորհրդանշում են աշխարհի չորս կողմերը, և այն ժամանակաշրջանը, երբ բոլորը սպարապետի շուրջն էին համախմբվել»:
Սպարապետ Վազգեն Սարգսյանի եղբայրը`Արամ Սարգսյանն էլ ասաց, որ սա ևս մեկ առիթ է գնահատելու եղբոր հայրենանվեր գործը: «Նման հուշարձաններ տեղադրվում են գրեթե ամեն տարի, ինչպես Հայաստանի սահմանամերձ շրջաններում, այնպես էլ Արցախում: Մենք նախապես իմացել ենք, և բնականաբար մեր դրական գնահատականն ենք տալիս նմանատիպ միջոցառումներին»:
Հայկ ՄԱԳՈՅԱՆ
Հուշարձանի բացմանը նվիրված հոդված, որում հուշարձանը տենց էլ չտեսանք։
ՍԹԱՓՎԵ՛Ք։