Վրաստանին սահմանակից, Նոյեմբերյանի տարածաշրջանի Դեբեդավան համայնքի ղեկավար Վանյա Դամիրչյանը հայտնեց, որ Երեւանի շամպայն գինիների գործարանի Դեբեդավանի ընդունման կետն այս տարի խաղող սկսել է ընդունել սեպտեմբերի 23-ից:
Ինքը՝ գյուղապետ Դամիրչյանն այնտեղ հանձնել է շուրջ 20 տոննա խաղող: Նա ասաց, որ Դեբեդավանի ընդունման կետում խաղողագործների հետ նախնական պայմանագրեր չեն կնքվում, պայմանագրեր կնքվում են խաղողի ընդունման ժամանակ: Դեբեդավանում խաղողն ընդունել են կիլոգրամը 120 դրամով:
Երեւանի շամպայն գինիների գործարանի Դեբեդավանի ընդունման կետի տնօրեն Լիդիա Ներսիսյանն ասաց, որ արդեն ավարտել են խաղողի ընդունումը, մթերել են շուրջ 1220 տոննա խաղող: Ըստ խաղողագործների հետ կնքված պայմանագրերի՝ հանձնված խաղողի դիմաց գումարների վճարումը կկատարվի մինչեւ 2016թ. հունվարի 31-ը, սակայն ընդունման կետի աշխատակիցը վստահեցրեց, որ իրենք դեկտեմբեր ամսվա ընթացքում բոլոր գումարները կվճարեն:
Դեբեդավան գյուղից ընդամենը 25 կիլոմետր հեռավորությամբ, Բերդավանի գինու գործարանում հոկտեմբերի 5-ից Գագիկ Ծառուկյանի ներկայացուցիչների կողմից կիլոգրամը 150 դրամով խաղող է ընդունվում: Հոկտեմբերի 3-ի երեկոյան Ծառուկյանը եղել է Բերդավանում եւ անսալով բերդավանցիների խնդրանքին՝ սահմանամերձ գյուղում խաղողի ընդունման գինը 10 դրամով բարձրացրել է, 140-ից դարձնելով 150 դրամ: Տավուշի մարզի մյուս գործարաններում ՝ Երեւանի կոնյակի գործարանի Բերդի մասնաճյուղում եւ Իջեւանի գինու գործարանում խաղողն ընդունվում է 140 դրամով:
Կարդացեք նաև
Դեբեդավանում ընդունվող խաղողը որակյալ է, քանի որ շամպայն պատրաստում են միայն բարձրորակ խաղողից: Դեբեդավան համայնքի ղեկավարին հարցրինք, թե ինքը եւ իր համագյուղացիները ինչո՞ւ իրենց բերքը 150 դրամով չեն հանձնել Բերդավանի գինու գործարան եւ այնտեղ իսկույն ստացել խաղողի գումարը: Վ. Դամիրչյանը հայտնեց, որ իր տվյալներով՝ Դեբեդավանի ընդամենը մի բնակիչ է խաղողը Բերդավանում հանձնել: Նրա խոսքերով՝ Դեբեդավանը ցածրադիր է, այնտեղ խաղողը շուտ է հասունանում, խաղողագործները միշտ երկյուղելով եղանակի փոփոխություններից՝ գերադասում են այն շուտ քաղել եւ հանձնել: Բացի այդ, դեբեդավանցիներն անտեղյակ էին , որ հոկտեմբերի 5-ից Բերդավանի գինու գործարանում 150 դրամով խաղող է ընդունվելու:
Ոսկան ՍԱՐԳՍՅԱՆ
