Հայաստանի ազգային գրադարանի Արվեստի և ոչ գրքային հրատարակությունների բաժինն այսօր հայ գեղանկարիչների աշխատանքների ալբոմային հրատարակությունների ցուցադրություն էր կազմակերպել: Ցանկացողներն այն դիտելու հնարավորություն ունեն նաև վաղը՝ հոկտեմբերի 8-ին:
Ներկայացված են Մինաս Ավետիսյանի, Եղիշե Թադևոսյանի, Վարդգես Սուրենյանցի, Հովհաննես Այվազովսկու, Էդուարդ և Արամ Իսաբեկյանների, Նիկոլ Աղաբաբյանի, Հրանտ Թադևոսյանի, Սիմոն Գալստյանի, Ժանսեմի և այլ արվեստագետների աշխատանքների ալբոմային հրատարակությունները:
«Մեր բաժինը շատ հարուստ է հայ գեղանկարիչների ալբոմներով: Սակայն այս ցուցադրությունը մի փոքր համեստ ենք կազմակերպել, փորձել ենք առավել հայտնիներին ընդգրկել»,- Aravot.am-ի հետ զրույցում ասաց Արվեստի և ոչ գրքային հրատարակությունների բաժնի աշխատակից Լուսինե Հիշեյանը:
Նրա խոսքով՝ այսպիսի ցուցադրություններ իրենք հաճախակի են կազմակերպում: Այս կամ այն արվեստագետի հոբելյանը նշելիս անպայման ցուցադրում են նրա բոլոր ալբոմները:
Կարդացեք նաև
«Մենք այստեղ նաև մի պահարան ունենք, որը նախատեսված է գեղանկարիչների ալբոմները հաճախակի ցուցադրելու համար: Այդ պահարանն անընդհատ թարմացվում է: Այնպես որ, այցելուներն այստեղ կարող են տեսնել ինչպես հայտնի, այնպես էլ այնպիսի նկարիչների ալբոմներ, որոնց անուններն անգամ չեն լսել»,- նշեց մեր զրուցակիցը:
Նրա փոխանցմամբ՝ այսպիսի ցուցադրությունների այցելուները հիմնականում ուսանողներն են: Նրանց ավելի շատ հին և միջնադարյան շրջանի գեղանկարչությունն է հետաքրքրում, իսկ ժամանակակից գեղանկարչության նկատմամբ հետաքրքրությունը կարծես թե մեծ չէ:
Սիրանուշ ՀԱՅՐԱՊԵՏՅԱՆ
