«Նոր Սահմանադրության տարբերակը էականորեն շատ ավելի լավն է, քան գործող Սահմանադրությունը»,- հոկտեմբերի 7-ին «Հայելի» մամուլի ակումբում լրագրողների հետ հանդիպման ընթացքում ասաց ԱԺ պատգամավոր Վարդան Այվազյանը:
Նա նշեց, որ երկու առաջարկություն է ներկայացրել եւ երկուսն է ընդունվել են: Այդ առաջարկություններից մեկը Կենտրոնական բանկի խնդիրների եւ նպատակների մասին է, իսկ մյուսը՝ մենաշնորհների. «Սահմանադրության այս տարբերակը հնարավորություն է տալիս քաղաքական մենաշնորհից դուրս գալու, ամենակարեւոր խնդիրն է: 1995 թվականից մինչեւ հիմա ես պատգամավոր եմ, ամենաերկար պատգամավորներից մեկն եմ, որ մնացել եմ, չի եղել մի ժամանակահատված, որ համամասնական ընտրություններում քաղաքական 1 ուժ վերցնի բացարձակ մեծամասնություն, չի եղել քաղաքական ընտրություններից 1 ժամանակահատված, որ ընդդիմադիր ուժերը չուզեն համամասնական ընտրացուցակներով գնալ ընտրություններին, չգիտես՝ ինչու: Այսինքն՝ անցած անգամ Հանրապետականը, հիմա որ ունենք բացարձակ քաղաքական մեծամասնություն, ունի, եթե ես չեմ սխալվում, համամասնական ցուցակով անցած 43 պատգամավոր, այսինքն՝ որ իր 66-ը լրացնի, դա մեծամասնականից եկած թիվ է: Հիմա ասում ենք՝ հրաժարվում ենք մեծամասնականից, ես չգիտեմ՝ ինչի համար է սա արվում»:
Վարդան Այվազյանը առանձնացրեց նաեւ մենաշնորհների խնդիրը՝ նշելով, որ մենաշնորհը պետք է կարգավորվի օրենքով. «Այսինքն՝ եթե մարդն ունի մենաշնորհ, մենք պետք է օրենքով նախօրոք նախատեսենք դա: Այսինքն՝ լրջագույն խնդիրներ են»:
Ամի ՉԻՉԱԿՅԱՆ
