Մեծամորի ատոմակայանի աշխատանքը Հայաստանում կարող է օգնել էականորեն նվազեցնել էլեկտրաէներգիայի սակագինը: Այս հայտարարությունն, ըստ «TASS»-ի, այսօր՝ հոկտեմբերի 7-ին, «Ատոմեքս-Հայաստան» համաժողովի ընթացքում արել է ռուսական «Ռոսատոմ» ընկերության ղեկավար Սերգեյ Կիրիենկոն:
«Գործող էներգաբլոկն ապահովում է էլեկտրաէներգիայի 35%-ից 37%-ը: Սա Հայաստանի էներգետիկ անվտանգության հարցն է: Մենք ուսումնասիրել ենք կատարված հաշվարկները: Եթե հանկարծ Մեծամորի ատոմակայանը դադարի աշխատել, էլեկտրաէներգիայի սակագնը 3 անգամ կավելանա»,- նշել է Կիրիենկոն:
Նա նաեւ ավելացրել է, որ սա ավելի էժան էլեկտրաէներգիա է եւ Մեծամորի ատոմակայանի աշխատանքի հաշվին Հայաստանի կառավարությունը կարող է էականորեն նվազեցնել էլեկտրաէներգիայի սակագինը բնակչության եւ գործարարների համար:
Պատրաստեց Աշոտ ԻՍՐԱԵԼՅԱՆԸ
