Հոկտեմբերի 6-ին Երեւանի Հակոբ Պարոնյանի անվան երաժշտական կոմեդիայի թատրոնում կրկին կցուցադրվի «Աղջիկը լուսնի վրա» պարային բեմադրությունը: Այն ԱՄՆ դեսպանատան «Ամերիկյան մշակութային շրջագայություն-2015» ծրագրի շրջանակներում է: Ներկայացման բալետմայստերը Արինա Արարատյանն է:
«Աղջիկը լուսնի վրա» ներկայացումը ներառական է: Այն պարի լեզվով փաստում է, որ հաշմանդամություն ունեցող մարդիկ կարող են լիարժեքորեն դրսեւորվել ու կյանքի կոչել իրենց երազները:
Aravot.am-ը զրուցեց ներկայացման հերոսներից Գոհար Նավասարդյանի հետ: Գոհարն ասաց, որ առաջին անգամ խաղալուց շատ լարվում էր, իսկ այժմ ավելի հանգիստ էր փորձերին ու բեմում նույնպես հանգիստ կլինի: «Ամերիկյան մշակութային շրջագայություն-2015» ծրագրի շրջանակներում ներկայացումը կխաղան նաեւ Գյումրիում՝ հոկտեմբերի 13-ին: «Ներկայացումը շատ սիրում եմ, ոչ թե նրա համար, որ խաղում եմ, այն հոգեհարազատ է գունային գամմայի, մտահղացման եւ այլ առումներով: Այդ ներկայացման մեջ իրականացել է իմ երազանքը՝ երազում էի բեմում պարել եւ արեցի դա»:
Կարդացեք նաև
Գոհար Նավասարդյանը նշեց, որ երեխա ժամանակ միշտ երազում էր Մոխրոտիկին մարմնավորել, իսկ հիմա վստահ է, որ «Աղջիկը լուսնի վրա» ներկայացման մեջ իրեն վստահված դերը ճիշտ իր համար է:
«Այդ ներկայացմանը պատրաստվելիս շատ բաներ բացահայտեցի, օրինակ՝ ճանաչեցի բեմը, ետնաբեմում կատարվող իրադարձությունները, հասկացա, թե ինչպես են թատրոնում ծնվում գլուխգործոցները»,-ասում է Գոհար Նավասարդյանը:
Գոհար ՀԱԿՈԲՅԱՆ
