«Նման գործողություններով ոստիկանությունը եւ ընդհանրապես իշխանությունները, բնականաբար, չեն կարող կոտրել այն ոգին, որը կա այսօր ընդդեմ սահմանադրական փոփոխությունների»,- հոկտեմբերի 6-ին «Նոյյան տապան» մամուլի ակումբում լրագրողների հետ հանդիպման ընթացքում ասաց «Չե՛ք անցկացնի» նախաձեռնության անդամ Հրայր Մանուկյանը:
Նրա խոսքերով՝ նախաձեռնությունը շարունակելու է իր պայքարը, ավելի է ուժգնացնելու այն եւ արդյունքում հասնելու է իր նպատակին, այն է՝ տապալել է սահմանադրական փոփոխությունները:
«Չե՛ք անցկացնի» նախաձեռնության անդամ Արշակ Մուսախանյանը, անդրադառնալով հոկտեմբերի 5-ին տեղի ունեցած բողոքի ակցիային եւ դրա ընթացքում ոստիկանության կատարած գործողություններին, ասաց, որ իրենք պատրաստում են ընդդեմ ոստիկանության երեք հայց ներկայացնել դատարան. «Առաջինը՝ այն մասով, որ ոստիկանությունը ապօրինի միջամտել է մեր խաղաղ ցույցին, եւ պետք է պատասխանատվություն ենթարկվի դրա համար:
Երկրորդը, որ ոստիկանությունը ապօրինի 21 քաղաքացու տարել է ոստիկանության բաժիններ, եւ դրա համար նույնպես պետք է պատասխանատվության ենթարկվի:
Կարդացեք նաև
Եվ երրորդ՝ ոստիկանությունը խախտել է ԱԺ Արամ Մանուկյանի անձեռնմխելիության եւ ազատ գործունեության իրավունքը, ըստ էության, երբ Արամ Մանուկյանին բերման են ենթարկել մեքենայի մեջ, համարվում է, որ բերման ենթարկելու փաստը գոյություն ունի եւ դրա համար նույնպես դիմելու ենք դատարան»:
Ամի ՉԻՉԱԿՅԱՆ
