Բռնապետական երկրում ոնց կարելի է չսպասել խոչընդոտման փորձերի»
Այսօր Ազգային Ժողովի շենքի դիմաց «Չեք անցկացնի» նախաձեռնության խմբի կազմակերպած խաղաղ ցույցին մասնակցում էին նաեւ ՀԱԿ խմբակցության անդամներ, որոնցից մեկին անգամ քիչ էր մնում բերման ենթարկեին:
ՀԱԿ վարչության անդամ Արեգ Գեւորգյանը, որը նույնպես բերման էր ենթարկվել՝ Aravot.am-ի հետ հեռախոսազրույցում ասաց, որ եղավ շատ հաջողված ցույց, ոստիկանության ցույցը ցրելու ծիծաղելու փորձ, եւ հետագա անելիքների մասին որոշում` կոնկրետ մարզային այցելություններ եւ հոկտեմբերի 31-ին հանրահավաք: «Եթե դուք սպասում եք, որ կասեմ, թե ինչ է նախապատրաստվում ոստիկանության նման գործողությունների դեմ, կամ իշխանությունների նման վարվելակերպի դեմ, ապա` թե ոստիկանությունը, թե իշխանությունը պատասխանը կստանան հոկտեմբերի 31-ի հանրահավաքին»,-նշեց պարոն Գեւորգյանը:
Նա ոստիկանության այսօրվա գործողությունները մեկնաբանեց հետեւյալ կերպ. «Բոլորը ծիծաղելի պատրվակներ են հավաքը խոչընդոտելու համար, որը, իհարկե, չհաջողվեց: Բռնապետական երկրում ոնց կարելի է չսպասել նման ծիծաղելի խոչընդոտման փորձերի, երբ Սերժ Սարգսյանը իշխանության է»:
Կարդացեք նաև
Նա նշեց, որ այդ պայքարով ժողովրդին Սերժ Սարգսյանի կլանի հավերժացման վտանգից են հեռու պահում: «Սա Սերժ Սարգսյանի ընտրվել-չընտրվելու հարցն է. Սահմանադրական հանրաքվեում դրվելու է հարց` ժողովուրդը ուզում է մնալ Սերժ Սարգսյանի կլանի լծի տակ, թե չի ուզում այլեւս հանդուրժել այդ լուծը»,- ասաց Արեգ Գեւորգյանը:
Անուշ ՄԱԹԵՎՈՍՅԱՆ
