«Չեք անցկացնի» նախաձեռնության անդամ Արմեն Գրիգորյանը պնդում է, որ Երեւանի փոխոստիկանապետ Վալերի Օսիպյանն այդպես էլ իրենց այսօր չբացատրեց, թե ինչ օրենք են խախտում ԱԺ շենքի դարպասներին «ՈՉ» գրությամբ պաստառ փակցնելով: Նրա խոսքով, ոստիկաններն այսօր ակցիայի ժամանակ երկու դրոշ են կոտրել. «Պաստառն էլ, որը չէին թույլատրում փակցնել, վրան ընդամենը մի հատ «ոչ» էր գրված: Բռնությունների դիմեցին, պաստառը պատռեցին ու տարան»:
Նա ասաց, որ իրենց հետագա քայլերը մարզային այցելություններն են լինելու. «Հոկտեմբերի երեսունին հանրահավաք ունենք Երեւանում, ավելի շատ ունենալու ենք փողոցային պայքար, քանի որ այսօր սպառվելու են պետական համակարգի վրա ազդեցություն ունենալու բոլոր գործիքները, փողոցային պայքարով կկասեցնենք սահմանադրական փոփոխությունները»:
Ինչպես արդեն տեղեկացրել ենք, այսօր «Չեք անցկացնի» նախաձեռնության կազմակերպած ակցիայի ժամանակ ոստիկանները ցուցարարներին բերման ենթարկելիս փորձեցին բերման ենթարկել նաեւ ցուցարարների մեջ գտնվող ՀԱԿ պատգամավոր Արամ Մանուկյանին:
Կարդացեք նաև
Aravot.am-ը Արամ Մանուկյանից հետաքրքրվեց՝ ոստիկաններն իրեն չճանաչելո՞վ էին բերման ենթարկում, թե գիտակցաբար, պարոն Մանուկյանը կարճ պատասխանեց. «Զգացին, որ հիմարություն են անում»:
ԱԺ շենքի դիմացի բողոքի ակցիան ավարտվեց Արաբկիրի ոստիկանության բաժնի մոտ, ցուցարարները գնացին այնտեղ դիմավորելու իրենց բերման ենթարկված ընկերներին:
Արփինե ՍԻՄՈՆՅԱՆ
