ՀՀ պաշտպանության նախարարի խորհրդական Արմեն Սարգսյանը «Իրավունքին» որոշ պարզաբանումներ էր ներկայացրել հայկական կողմի` Աղդամի ուղղությամբ հակառակորդի «պոստեր» գրավելու վերաբերյալ տեղեկատվության առիթով: Նա մասնավորապես փոխանցել էր. «Այո, վերջին լարվածությունների ընթացքում այն «պոստերը», դիրքերը, որտեղից թշնամին փորձում է ավելի հաճախակի, ավելի շատ, այսպես ասած՝ իր ատամները ցույց տալ, այդ ատամները ջարդվում են: Այլ կերպ ասած՝ հիմնահատակ վերանում են այդ դիրքերը: Ունենք երեք-չորս հատված, որտեղ թշնամուն լիարժեք հակահարված տալուց հետո վերացվել են նաև խրամատային որջերը, որի արդյունքում հակառակորդը դիմել է փախուստի: Վստահ եղեք, որ կան դիրքեր, որոնք ոչնչացվել են՝ թշնամուն արժանի հակահարված տալու համար»:
Aravot.am-ը Razm.info մասնագիտացված կայքի համակարգող Կարեն Վրթանեսյանից հետաքրքրվեց` ինչպե՞ս են այս փաստը ներկայացնում ադրբեջանական ԶԼՄ-ները և արդյոք նման իրադարձությունների մասին անընդհատ բարձրաձայնելը անհրաժե՞շտ է, թե՞ ոչ: Պարոն Վրթանեսյանը պատասխանեց, որ մեծ տարբերություն կա «պոստեր» գրավելու և ոչնչացնելու միջև ու շեշտեց, որ այս դեպքում խոսքը ոչնչացնելու մասին է, այլ ոչ գրավելու:
Հետաքրքրվեցինք` ինչպե՞ս է այս փաստը ներկայացնում ադրբեջանական կողմը: Կարեն Վրթանեսյանը պատասխանեց. «Իրենք թաքցնում են ամեն ինչ. օրինակ`իրենք սեպտեմբերան վերջին լարվածության ընթացքում ընդամենը 4 մարտական կորուստ են ընդունել, բայց իրականում ավելի շատ կորուստներ են տվել: Օրինակ` ՊՆ-ի ներկայացրած տվյալների համաձայն` 20-ից ավելի կորուստ են տվել»:
Կարդացեք նաև
Դառնալով հարցին` արդյոք «պոստերի» և նմանատիպ հարցերի հետ կապված թեմաների լուսաբանումը նպատակահարմա՞ր է, փորձագետը նկատեց, թե ընդհանրապես ինչքան քիչ ինֆորմացիա տրվի, այնքան ավելի լավ, բայց մյուս կողմից՝ հավասարակշռվածության հարց կա, մարդիկ էլ պետք է տեղեկատվություն ստանան: Փորձագետը «մեդիա աժիոտաժին» դեմ է:
Կարեն Վրթանեսյանը նշեց, որ ադրբեջանական լրահոսում չի հայտնվում սահմանից` Ադրբեջանի համար ոչ բարենպաստ նորություն:
Ապատեղեկատվության տարածման մասին էլ ասաց. «Ապատեղեկատություն տարածելը դեռ իրենց մոտ չի ստացվում: Օրինակ` մի տեսանյութ էին տարածում` իրենց բառերով ասած` իբր հայ զինվորների են ոչնչացնում, մինչդեռ այդ օրերին հայկական բանակը որևէ կորուստ չէր տվել: Պարզապես ինչ-որ հրետակոծություն էին նկարահանել ու դա ներկայացնում էին որպես կորուստ»:
Տաթև ՀԱՐՈՒԹՅՈՒՆՅԱՆ
