Երեւանի փոխոստիկանապետ Վալերի Օսիպյանը այսօր ԱԺ-ի շենքի առջեւից շուրջ երկու տասնյակ ցուցարարների բերման ենթարկելու գործողությունները բացատրեց իրավիճակը կառավարելու հանգամանքով:
Նրա խոսքով, ցուցարարները խախտել են հավաքների ազատության մասին օրենքի դրույթները՝ «Ոչ» գրությամբ պաստառը խորհրդարանի շենքի ճաղավանդակներին փակցնելով. «Վարչական վարույթ է իրականացվում բերման ենթարկվածների նկատմամբ, իրականացնելուց հետո բոլորին էլ ազատ կարձակեն: Ոստիկանությունը մշտապես հանդուրժողականություն է դրսեւորել, բայց այդ հանդուրժողականությունը երբեմն անօրինականությունների կողմնակիցների մոտ դիտվում է աշխատելաոճ: Փոքր պաստառները անտեսեցինք, բայց տեսեք, մտածեցին ամբողջ լայնքով պաստառ կարող են փակցնել: Հարցը պաստառի գրությունը կամ չափսերը չեն, թող համապատասխան թույլտվություն ստանային, հավաքի կազմակերպիչները նշեին, որ պաստառ են փակցնելու ճաղավանդակներին»:
Պարոն Օսիպյանից հետաքրքրվեցինք, իսկ ոստիկանները չգիտե՞ն, որ պատգամավորի չի կարելի բերման ենթարկել ու պատգամավորին բերման ենթարկելու փորձ կատարած ոստիկանների նկատմամբ ծառայողական քննություն կնշանակվի՞, ի պատասխան Երեւանի փոխոստիկանապետը շարունակեց. «Ոչ մեկը բերման չի ենթարկել: Բացի դա, ոստիկանները պարտավոր չեն ճանաչել բոլոր պատգամավորներին, եթե պատգամավորը դուրս է եկել ԱԺ-ից ու կանգնել ցուցարարների կողքին, թող իր մոտ տարբերանշան լիներ, որ պատգամավոր է:
Այ, խոսեք նրա մասին, որ տեւական ժամանակ խնդրանքով դիմում էինք այդ նույն պատգամավորին, իսկ իրենք պայման էին դնում՝ պարոն Օսիպյան, հինգ րոպե, տասը րոպե»:
Կարդացեք նաև
Պարոն Օսիպյանը նաեւ պատմեց, որ երբ թյուրիմացաբար ՀԱԿ պատգամավորին նստեցրել են բերման ենթարկվածների համար նախատեսված ոստիկանական մեքենա, ինքը մոտեցել է ու ասել՝ իջեք, բայց պատգամավորը հրաժարվել է՝ ասելով՝ չեմ իջնում:
Հիշեցնենք, որ «Չեք անցկացնի» նախաձեռնության անդամներն այսօր բողոքի երթ էին անցկացրել Ազատության հրապարակից մինչեւ ԱԺ: Բողոքի ակցիայի ժամանակ ոստիկանների ու ցուցարարների միջեւ սկսվեց քաշքշուկ, արդյունքում բազմաթիվ ցուցարարներ բերման ենթարկվեցին:
Արփինե ՍԻՄՈՆՅԱՆ
