Այսօր կառավարության ընդունելությունների տանը մեկնարկեց «Խաղաղապահական գործողությունների մարտահրավերների միջազգային ֆորումի» ամենամյա համաժողովը:
Պաշտպանության նախարար Սեյրան Օհանյանի խոսքով, իրենք ներկայացրել են խաղաղությանը վերաբերող բոլոր գործողությունները, որոնք անհրաժեշտ են՝ մարտահրավերների, հակամարտությունների սկզբնական փուլից մինչեւ խաղաղության ամրապնդում. « Այդ գործողություններում փոխգործունակ ենք ու ցույց տվեցինք, որ Հայաստանի խաղաղապահ ուժերի բրիգադան օրինակելի է ու կարող է ուսումնանյութական բազայի ՀԱՊԿ շրջանակներում համապատասխան հենք լինել:
Մենք, ասելով չէ, որ գիտենք խաղաղության արժեքը, թե ինչ գին պետք է վճարել դրա համար: Չնայած մեր սահմաններում, ախոյանի նախահարձակ գործողությունները զսպելու, պատժելու օրախնդիր հարցերին ՝ մենք հաստատակամորեն զարգացնում ենք ՀՀ խաղաղապահ կարողությունները»:
Արտաքին գործերի նախարար Էդվարդ Նալբանդյանն էլ շարունակեց՝ ասելով, որ Հայաստանը մեծ կարեւորություն է տալիս խաղաղապահության ոլորտում աճող ներգրավվածությանը եւ ամրապնդում է իր համապատասխան կարողությունները. «Խաղաղապահությունը, ձեւավորվելով 1940-ականների վերջին, անցել է զարգացման ուղիով: Ի հայտ եկած նոր իրավիճակները, նպատակները պահանջել ու պահանջում են անցած ուղու անաչառ գնահատական, անելիքների նախանշում ու համապատասխան ուղենիշերի մշակում: Մենք շահագրգիռ հետեւում ենք խաղաղապահ գործողությունների հայեցակարգերի զարգացմանը եւ նոր մոտեցումների կիրառմանը… հարատեւ խաղաղության կարելի է հասնել ոչ թե ուժի կիրառման, այլ քաղաքական լուծումների միջոցով: Դրանք պետք է ընդունվեն հակամարտության բոլոր կողմերի մասնակցությամբ: Քաղաքական լուծումները պետք է որոշեն ու ուղղորդեն խաղաղապահ գործողությունների ձեւաչափը»:
Կարդացեք նաև
Նախարարն իր խոսքը եզրափակեց Սերժ Սարգսյանի ելույթից մի հատվածով. «Միջազգային խաղաղության ու անվտանգության պահպանումը բոլորիս՝ թե մեծ, թե փոքր պետությունների առաջնային պատասխանատվությունն է»:
Արփինե ՍԻՄՈՆՅԱՆ
