ՀԹՖ նախագահ, հեռացատկի Եվրոպայի չեմպիոն ու ռեկորդակիր Ռոբերտ Էմմիյանի նախաձեռնությամբ եւ ՀԱՕԿ-ի, Երեւանի քաղաքապետարանի ու ՀՀ սպորտի եւ երիտասարդության նախարարության աջակցությամբ Երեւանում կայացավ Հայաստանում առաջին միջազգային կիսամարաթոնը, որին ընդհանուր առմամբ մասնակցեց շուրջ 30 երկրների չորս հազարից ավելի վազորդ: Ըստ տարիքային խմբերի եւ պատրաստվածության աստիճանի , այդ թվում նաեւ՝ հաշմանդամների մասնակցությամբ, Հանրապետության հրապարակում տրվեց չորս մրցատարածությունների մեկնարկ:
Դիմելով բոլոր մասնակիցներին՝ Ռոբերտ Էմմիյանը շնորհակալություն հայտնեց բոլոր մասնակիցներին, որոնցից շատերը եկել էին ընտանիքներով, արտասահմանից ժամանած հյուրերին: «Դուք բոլորդ էլ հաղթող եք, բոլորդ էլ առաջինն եք լինելու, քանի որ իմ երազանքը հայ ժողովրդին առողջ տեսնելն է, իսկ առողջությունը առաջին բանն է, որ անհրաժեշտ է ցանկացած մարդու: Նայելով ձեզ՝ կարծում եմ, որ Երեւանի առաջին կիսամարաթոնը կայացավ: Ուզում եմ հավատալ, որ այսօր ձեր մեջ կծնվեն այնպիսիք, ովքեր հետագայում կմասնակցեն աշխարհի տարբեր երկրներում կազմակերպվող երկար ու միջին տարածության ամենահեղինակավոր վազքերին: Սա միայն սկիզբն է: Երեւանյան կիսամարաթոնը լինելու է շարունակական եւ այսուհետեւ ամեն տարի այն կկազմակերպենք Հայաստանի տարբեր մարզերում եւ Արցախում», – ասաց լեգենդար ցատկորդը, որի՝ 1987 թվականին Ծաղկաձորում սահմանած հեռացատկի 8,86 մետր Եվրոպայի ռեկորդը 29 տարի մնում է չգերազանցված:
Այնուհետեւ, Ռոբերտ Էմմիյանը եւ ՀՀ սպորտի եւ երիտասարդության հարցերի նախարար Գաբրիել Ղազարյանը միասին տվեցին կիսամարաթոնի մեկնարկը:
Աշոտ ՀԱԿՈԲՅԱՆ
