Հարցազրույց Հայաստանի Ազգային կինոկենտրոնի տնօրեն ԳԵՎՈՐԳ ԳԵՎՈՐԳՅԱՆԻ հետ:
-Դուք մի առիթով ասել եք, որ, ամենայն հավանականությամբ, ԱԺ աշնանային նստաշրջանի օրակարգում կընդգրկվի «Կինոյի մասին» օրենքի նախագիծը: Ի՞նչ է նախատեսված նախագծով:
-Հանրապետության նախագահն առաջարկել է ստեղծել «Կինոյի մասին» օրենքի նախագիծ ու ներկայացնել խորհրդարան: Իսկ դա երաշխիք է, որ խնդրին լուրջ կմոտենան:
Նախագծում, որի վրա աշխատել են կինոգործիչներ, ներառված են հարկային, մաքսային արտոնություններ, նշված է, թե ինչ արտոնություններ պիտի ունենա ազգային ֆիլմը, ինչ արտոնություններ՝ այն խմբերը, որոնք Հայաստանում համատեղ ֆիլմարտադրությամբ կզբաղվեն:
Պետությունը, բացի ֆիլմի արտադրության ընթացքին միջամտելուց, պետք է օգնի նաեւ հետարտադրական՝ ցուցադրման գործընթացին, որպեսզի հայկական կինոն հայ հանդիսատեսին հասնի: Եթե, ասենք, կինոթատրոնները ոչ կոմերցիոն համարվեն, պետությունը ցուցադրման համար լրացուցիչ գումարներ պիտի ներդնի: Նույնը պետք է արվի հեռուստաընկերությունների դեպքում:
Նախագծում արտոնություններ են սահմանված նաեւ ներդրողների համար, նշված է, թե, բացի պետական միջոցներից, ինչ լրացուցիչ միջոցներ կներգրավվեն ֆիլմարտադրության գործընթացներում:
Մի խոսքով՝ շատ լավ նախագիծ է ոչ միայն հայ, այլեւ դրսի կինոարտադրողների համար, ու եթե այն մեր ուզած տեսքով աշնանային նստաշրջանում անցնի, մենք՝ կինոգործիչներս, գոհ կլինենք:
-Որտե՞ղ է հիմա նախագիծը:
-Ներկայացրել ենք կառավարություն, որն էլ ուղարկել է համապատասխան գերատեսչություններին, որոնք այս կամ այն կերպ առնչվում են կինոարտադրությանը: Նրանք կառավարությանը կներկայացնեն իրենց նկատառումները, տեղի կունենան քննարկումներ, որից հետո միայն կներկայացվի ԱԺ: Կարծում եմ՝ մինչեւ տարեվերջ նախագիծը կստանա դրական լուծում եւ բավական կհեշտացնի կինոարտադրական գործընթացները:
Ռուսլան ԹԱԹՈՅԱՆ
Հրապարակումն ամբողջությամբ՝«Հայոց աշխարհ» թերթի այսօրվա համարում:
