Երբ լուսանկարում որեւէ մեկի, հատկապես երեխայի միայն մի աչքն է լուսավորված կարմիր գույնով, սա հուշում է, որ նրա մոտ առկա է ռետինոբլաստմա, եւ պետք է անմիջապես այցելել բժշկի: Այս մասին զգուշացնում է Healthy Food Team-ը:
Ռետինոբլաստման արագորեն աճող չարորակ ուռուցք է, որը զարգանում է ցանցաթաղանթի բջիջներում, իսկ աչքի մեջ տարօրինակ փայլ երեւալը հուշում է ուռուցքի առկայության մասին: Այն առաջանում է ցանցաթաղանթը կազմող ռետինոբլաստ կոչվող բջիջների գերաճի հետեւանքով եւ հանդիպում է մեծամասամբ երեխաների մոտ: Չնայած հիմնականում հնարավոր է փրկել երեխայի կյանքը, սակայն երեխաները կարող են կորցնել ախտահարված աչքի կամ աչքերի տեսողությունը: Հաճախ այս հիվանդությունը ձեռք են բերում 5 տարեկանից փոքր երեխաները:
Հիվանդությունն ունի 2 ձեւ՝ գենետիկ, որը ժառանգական է, եւ ոչ գենետիկ կամ հազվադեպ հանդիպող: Ռետինոբլաստմայով հիվանդ երեխաների մոտավորապես 55%-ը ունի ոչ գենետիկ, հազվադեպ ձեւը: Այս դեպքերի մոտ երկու երրորդում միայն մի աչքն է ախտահարված լինում (միակողմանի ռետինոբլաստմա), մնացած դեպքերում ուռուցքը զարգանում է 2 աչքերում (երկկողմանի ռետինոբլաստմա):
Ուռուցքի թիվը եւ չափը յուրաքանչյուր աչքում կարող է տարբեր լինել: Վերջիններիս դիրքը, չափը եւ քանակը դեռեւս ուսունասիրվում եւ համապատասխան բուժում են գտնում:
Եթե մենք լուսանկարվում ենք՝ օգտագործելով տեսախցիկի լույսը, առողջ աչքում բիբը կարող է կարմիր լինել, մինչդեռ այդ դեպքում ախտահարված աչքում բիբը սպիտակ կամ դեղին է երեւում: Բբի դեղնավուն տեսքը կարող է երեւալ նաեւ արհեստական աղոտ լույսի տակ եւ կատվի աչք հիշեցնել: Սա հիվանդության ամենատարածված ու ակնհայտ ախտանշանն է:
Այլ, ավելի քիչ տարածված ախտանշաններ են տեսողության վատացումը, կարմիր եւ գրգռված աչքը, որոնք կանգնեցնում են աճը կամ խանգարում զարգացմանը: Որոշ երեխաների մոտ կարող է զարգանալ նաեւ շլություն:
Եթե դուք նկատում եք այս ախտանիշներից որեւէ մեկը, պետք է այցելեք բժշկի:
Հայտնում է Healthy Food Team-ը:
Պատրաստեց ՆՈՒՆԵ ՂԱԶԱՐՅԱՆԸ
«Առավոտ» օրաթերթ
02.10..2015
