Արամ Մանուկյանի խոսքերով՝ Սերժ Սարգսյանն ասում է՝ «եթե ես չեմ, ուրեմն՝ ոչ մեկը չէ»
«Մեր խնդիրների լուծումը մեր միասնության մեջ է»,-հոկտեմբերի 2-ին Ազատության հրապարակում «Չեք անցկացնի» նախաձեռնության ընթացքում ասաց ԱԺ պատգամավոր Արամ Մանուկյանը:
Ըստ նրա՝ հասարակության բոլոր շերտերը պետք է միավորեն խնդիրները լուծելու համար, եւ հիմա հասարակությունը կանգնած է մի խնդրի առջեւ, որը կա՛մ կործանելու է, կա՛մ հաղթանակած ենք դուրս գալու այդ իրավիճակից:
«Այս հրապարակը եղել է միակուսակցության դեմ հրապարակ: Անկախությունից 25 տարի հետո այս մարդը ուզում է հետ պտտել, երբ ամեն ինչ կառավարվի մի տեղից եւ ուզում է քանդել համակարգը, որը կոչվում է կիսանախագահականը: Իր ասածն է՝ եթե ես չեմ, ուրեմն՝ ոչ մեկը չէ»,- ասաց նա:
Կարդացեք նաև
Արամ Մանուկյանի կարծիքով՝ արեւի տակ տեղ ունենալու ցանկությունը ստիպում է որոշակի կուսակցություններին դավաճանել իր սկզբունքները. «Մենք ասում ենք իշխանություն խելքդ գլուխդ հավաքի, երկիրը մի տար քյալագյոզության, երկիրը սահմանադրական փոփոխությունների անհրաժեշտությունը չունի, չի՛ կարելի գնալ արկածի»:
Արամ Մանուկյանի կանխատեսմամբ՝ եթե ժողովուրդը քվեարկի սահմանադրական փոփոխությունների օգտին, ապա դա կլինի ժողովրդի վերջին ընտրությունը: Նա դիմեց միջազգային կառույցներին՝ խնդրելով չմիջամտել, ժողովուրդը թո՛ղ որոշի:
Ամի ՉԻՉԱԿՅԱՆ
