Դավիթ Հարությունյանի կարծիքով՝ Սահմանադրությունը ժողովրդի օգնության կարիքն ունի
«Մենք կանգնած ենք երկու ճանապարհի առջեւ»,- հոկտեմբերի 2-ին Ազատության հրապարակում «Չե՛ք անցկացնի» նախաձեռնության կազմակերպած հանրահավաքի ընթացքում ասաց նախաձեռնության անդամ Հրայր Մանուկյանը:
Առաջին ճանապարհը թույլ տալն է, որ Սերժ Սարգսյանը անցկացնի սահմանադրական փոփոխությունները, ըստ նրա՝ դա նշանակում է, որ Սերժ Սարգսյանը վերարտադրելու է իրեն եւ իր ընտանիքին, դա նշանակում է ձախողված արտաքին հարաբերություններ: Իսկ երկրորդ ճանապարհը համախմբվելը եւ տապալելն է. «Միայն այս դեպքում հնարավոր կլինի հասնել սահմանադրական կարգի վերականգման, սոցիալական արդարության: Միայն համախմբված պայքարի արդյունքում է, որ կկարողանանք հասնել փոփոխություններին»:
Կարդացեք նաև
Հրայր Մանուկյանը համարում է, որ սահմանադրական փոփոխություններից հետո կլինի միայն մեկ իշխող խումբ՝ Սերժ Սարգսյանի ընտանիքը. «Ես վստահ եմ՝ այս անգամ մենք անպայման հաջողելու ենք՝ չնայած նախորդ անհաջողությունների: Այնպես որ շնորհավորում եմ Երեւանից մեր շարժման մեկնարկով»:
Հանրահավաքի ընթացքում ելույթ ունեցավ նաեւ քաղաքացիական ակտիվիստ Դավիթ Հարությունյանը: Նա ասաց, որ Սահմանադրությունը ժողովրդի օգնության կարիքն ունի. «Ժողովրդի զգալի հատվածը չի գիտակցում Սահմանադրության կարեւորությունը, ինչը բնորոշ է պետականազուրկ հասարակությանը»:
Նա վստահություն հայտնեց, որ Սարգսյանը ոչ միայն վտանգում է պետությունը, այլ նաեւ հավերժացնում է իր իշխանությունը. «Խնդրում եմ վստահել «Չեք անցկացնի» քաղաքական նախաձեռնությանը եւ ոչ ասել այս կործանարար ծրագրին»:
Ամի ՉԻՉԱԿՅԱՆ
