«Ճիշտ է արել, որովհետեւ լիքը ռուբլի ունենք, լիքը տրանսֆերտները ռուբլով գալիս են: Կոնկրետ Հայաստանին դա օգուտ է»,- այսօր խորհրդարանում լրագրողների հետ զրույցում ասաց, ընդդիմադիր պատգամավոր, ՀՀ նախկին վարչապետ Հրանտ Բագրատյանն`անդրադառնալով օրերս ՀՀ վարչապետ Հովիկ Աբրահամյանի արած այն առաջարկին, որ էներգետիկ կարեւորագույն ապրանքների առեւտուրը ԵԱՏՄ շրջանակներում իրականացվի ռուբլով:
«Ինքը սխալ վիճակի մեջ է դրել ռուսներին: Փաստորեն, ռուսները, որ այդքան քննադատում են ամերիկացիներին, հրաժարվում են մեզ ռուբլով ապրանք վաճառել, երբ մեր ապրանքները ռուբլով են առնում»,- ասաց նա`հավելելով, որ հարցադրումը ճիշտ է նաեւ այն տեսանկյունից, որ ամենաէժան ռուբլին այսօր Հայաստանում է:
«Դրանից ռուբլին ոգեւորվում է, բայց ինքը դա միասնական արժույթի մասին չի ասել: Չգիտեմ`վերջը ինչ կլինի, բայց չեմ էլ կարծում, որ ՌԴ-ն չորով կարողանա մերժել: Պիտի հիմնավորի»,- կարծում է Հրանտ Բագրատյանը: Այս քայլը, ըստ նրա, ԵԱՏՄ տարածքում միասնական արժույթ ձեւավորելու հետ կապ չունի:
Նելլի ԳՐԻԳՈՐՅԱՆ
