Եվրոպայի խորհրդի խորհրդարանական վեհաժողովի (ԵԽԽՎ) աշնանային նստաշրջանի երեկվա լիագումար նիստում Երևանի ժամանակով ուշ երեկոյան ազատ դեբատների ժամանակ ադրբեջանական պատվիրակության անդամ Ռաֆայել Հուսեյնովը շահարկեց Ադրբեջանից ապաստան խնդրած հայ ակտիվիստ Վահան Մարտիրոսյանի արարքը: Այնուհետև անդրադարձավ Հայաստանի ներքաղաքական խնդիրներին, մտահոգություն հայտնեց ՀՀ տնտեսական զարգացման դանդաղ տեմպերի մասին:
Aravot.am-ի հետ զրույցում ԵԽԽՎ-ում հայաստանյան պատվիրակության անդամ , ԲՀԿ կուսակցության ղեկավար Նաիրա Զոհրաբյանն ասաց, որ ինքն ի պատասխան Հուսեյնովի հայտարարությունների` ԵԽԽՎ-ում ցույց է տվել Վահան Մարտիրոսյանի գժի թուղթը: Տիկին Զոհաբյանը մանրամասնեց. «Ասացի, որ նման կենդանի ցանկացած երկրում էլ կա և ցույց տվեցի օրաթերթերից մեկում տպագրված` նրա գժի թուղթը: Եվ Վեհաժողովին տեղեկացրի, որ ադրբեջանցի պատվիրակը հղում է անում հոգեկան խնդիրներ ունեցող մի անձի»:
Վեհաժողովի ընթացքում բարձրացվել է նաև սահմանային լարվածության հարցը: Մասնավորապես այս իրավիճակից օգտվել է Լեռնային Ղարաբաղի վերաբերյալ զեկույց նախապատրաստող անգլիացի պատվիրակ Ռոբերտ Ուոլտերը, որը հայտարարել է, թե սահմանային այս լարվածության պայմաններում՝ առավել հրատապ է դառնում իր զեկույցի նախապատրաստությունը, ինչին ի պատասխան հայկական կողմը արձագանքել է, թե 24 տարի է սահմանում լարված է, և ամենևին էլ Ուոլտերի անձով չի պայմանավորված խնդրի լուծումը:
Կարդացեք նաև
Հայ պատվիրակները Վեհաժողովի առաջ հարց են բարձրացրել այն մասին, որ Արցախի երիտասարդությունը չի կարողանում օգտվել եվրոպական ծրագրերից, այն դեպքում, երբ Արցախը կամովին միացել է Եվրոպական տարածքին: Պատվիրակները ևս մեկ անգամ հիշեցրել են, որ ԵԽԽՎ-ն չունի մանդատ ԼՂ հակամատության կարգավորման հարցում և թող իր մանդատով սահմանված հարցերին փորձի լուծումներ տալ:
Տաթև ՀԱՐՈՒԹՅՈՒՆՅԱՆ
