Այսօր լրագրողների հետ զրույցում խոսելով «Տաշիր գրուպի» սեփականատեր Սամվել Կարապետյանին ՀԷՑ-ի վաճառքի գործարքի մասին՝ ԱԺ նախագահ Գալուստ Սահակյանն ասաց, որ դա նպաստելու է, որ ՀԷՑ-ում ամբողջ կառավարման մեխանիզմները փոխվեն, կորուստները նվազեն. «Իմիջիայլոց, նրանք, ովքեր չեն հավատում աուդիտին, կարող են իրենք մասնակից դառնալ այդ գործընթացին»:
Լրագրողների հարցին՝ աուդիտը դեռ չի եղել, կարող է պարզվի, որ թանկացումն անհիմն է, սխալ է, ինչո՞ւ է վարչապետը արդեն պայմանավորվածությունների գալիս՝ Գալուստ Սահակյանը պատասխանեց. «Հանրային ծառայությունները կարգավորող հանձնաժողովի ձեռքում այն փաստարկները, որոնք կային, լրիվ հաստատում են, որ պիտի բարձրացումը լիներ: ՀԷՑ-ում աուդիտը կապված է, թե՛ որովհետեւ հասարակությունն անընդհատ ասում է, որ այստեղ կոռուպցիա կա, չգիտեմ ինչեր կան: Եթե կլինեն այդպիսի բաներ, բնականաբար, հետեւանքները այլ կլինեն»:
Գալուստ Սահակյանը լրագրողներին առաջարկել էր բիզնես դնել: Մեր հարցին՝ այս երկրում մենք այդքան հնարավորություն ունե՞նք այնքան հարստանալ, որ բիզնես դնենք՝ նա պատասխանեց. «Կարծում եմ, բիզնեսի համար ավելի շատ խելք է անհրաժեշտ, քան հարստություն: Իմիջիայլոց, մամուլն էլ է արդեն բիզնես դարձել»:
Մենք հետաքրքրվեցինք Սյունիքի մարզպետ Սուրիկ Խաչատրյանի որդու խափանման միջոցը փոխելու հարցով: Մեր հարցին՝ նորից «արդարությունը վերականգնվե՞ց»՝ Գալուստ Սահակյանը պատասխանեց. «Դա դատական պրոցեսների արդյունքում կձեւավորվի»:
Կարդացեք նաև
Լրագրողների հարցին՝ Գեւորգ Կոստանյանը հերթական անգամ փայլեց Սուրիկ Խաչատրյանին եւ նրա ընտանիքին պաշտպանելով, ինչո՞վ է պայմանավորված նրա առանձնահատուկ վերաբերմունքը Խաչատրյանների գերդաստանի նկատմամբ, որ ամեն անգամ ջրից չոր են դուրս գալիս՝ Գալուստ Սահակյանը պատասխանեց. «Գործի դատախազը Գեւորգ Կոստանյանը չի: Գլխավոր դատախազություն են ուղարկում, դատախազներից մեկը սկսում է գործը նայել եւ որոշում է կայացնում»:
Սարգսյան-Օբամա հանդիպման մանրամասներին տիրապետո՞ւմ եք հարցին Գալուստ Սահակյանը պատասխանեց, որ դեռեւս նախագահի հետ չի հանդիպել. «Բնականաբար, զրույց է տեղի ունեցել, բայց թե ինչ զրույց, կարծում եմ, երեւի թե համապատասխան մարմինները կներկայացնեն հասարակությանը»:
Դիտարկմանը, որ Օբաման դեմ արտահայտվեց Սահմանադրական բարեփոխումներին եւ ասաց՝ այն երկրները, որոնք փոխում են, իշխանությունները նպատակ ունեն վերարտադրվելու: Գալուստ Սահակյանը հեգնեց. «Այսինքն, ամբողջ աշխարհը, բացի Ամերիկայից, իրենց իշխանությունը երկարաձգում են»:
Հռիփսիմե ՋԵԲԵՋՅԱՆ
