Թուրքիայի մի խումբ արվեստագետներ եւ մտավորականներ ստորագրահավաք են սկսել, որի նպատակն է՝ թուրքական կառավարությունից պահանջել դադարեցնել այն դպրոցական դասագրքերի կիրառումը, որոնցում ատելություն է սերմանվում հայերի եւ Հայաստանի հանդեպ: Այս մասին այսօր լրագրողների հետ հանդիպմանն ասաց գերմանաբնակ թուրք երգչուհի Լեման Շտեհնը, որը Երեւանում ելույթ է ունենալու «Կոմիտաս» փառատոնի ընթացքում:
Նա տեղեկացրեց, որ ստորագրահավաքի հայ եւ թուրք նախաձեռնողները պահանջում են դասագրքերում ներառել Հայոց ցեղասպանության պատմությունը: «Այժմյան դասագրքերը պետք է ոչնչացվեն: Դրանցում հային դավաճան եւ թուրք ազգի թշնամի են ներկայացնում, ատելություն են սերմանում երեխաներին»,-ասաց Շտեհնը:
Երգչուհին նաեւ պատմեց, որ դեռեւս 1984թ-ին, երբ վերադարձել է Թուրքիա ուսանելու՝ մասնակցել է «Ազգային անվտանգություն» խորագրով դասընթացի. «Ուսուցիչը թուրքական բանակի զինվորական էր: Ասում էր, որ մենք ունենք երկու թշնամի ներքին եւ արտաքին, եւ իբրեւ թշնամի մատնացույց էր անում Թուրքիաի ազգային փոքրամասնություններին, այդ թվում՝ հայերին»: Շտեհնը դիմում է գրել ուսումնական հաստատության տնօրենին եւ հրաժարվել մասնակցել այդ դասընթացին: «Ինձ «ալմաջի»՝ գերմանացի անվանեցին»,-հիշեց երգչուհին:
Կարդացեք նաև
Լուիզա ՍՈՒՔԻԱՍՅԱՆ
