«Ես կարծում եմ՝ բոլորը կհամաձայնեն, որ բանակցային գործընթացի նպատակը Ղարաբաղի կարգավիճակը հստակեցնելն է: Եթե Հայաստանի նախագահն իր հայտարարությամբ նախանշում է Ղարաբաղի կարգավիճակը, նա փաստացի հայտարարում է, որ չկա բանակցելու անհրաժեշտություն»,- այս մասին «Մեդիա կենտրոնում» «Լարվածության նոր փուլ հայ-ադրբեջանական սահմանին և ղարաբաղյան հակամարտության գոտում» թեմայով քննարկմանն ասաց Քաղաքական եւ միջազգային հետազոտությունների հայկական կենտրոնի տնօրեն Աղասի Ենոքյանը:
Նա, մասնավորապես անդրադառնում էր օրերս ՀՀ նախագահ Սերժ Սարգսյանի արած հետեւյալ հայտարարությանը. « Երբ մենք ասում ենք, որ պատերազմից վախենում ենք, բայց կռվելուց չենք վախենում, դատարկ խոսքեր չեն: Հայաստանը, իսկ երբ ես ասում եմ Հայաստանը՝ Լեռնային Ղարաբաղը նրա անբաժան մասն է, երկրագնդի ամենառազմականացված տարածքներից են»:
Ռազմավարական եւ ազգային հետազոտությունների հայկական կենտրոնի ղեկավար Մանվել Սարգսյանն էլ կարծում է, որ այս հայտարարությունն արվել է ընդհանուր մոտեցման համատեքստում. «Եթե կա զսպման քաղաքականություն, հայտարարվում է, թե ով է այն վարելու: Հենց այդ մասին էլ խոսվել»,- նշեց նա եւ հավելեց, որ չի կարծում, թե սա Լեռնային Ղարաբաղի կարգավիճակի նախանշում է:
Քննարկմանը տեսազանգով միացած Հանուն միջազգային խաղաղության Կարնեգի հիմնադրամի վերլուծաբան Թոմաս դե Վալը նույնպես կարծիք հայտնեց, որ վերոնշյալ հայտարարությունն այսօր ընթացող քաղաքական պայքարի մաս է կազմում. «Ես չեմ համարում, որ դա Ղարաբաղի նոր կարգավիճակի մասին հայտարարություն է: Տարբեր տարիների տարբեր դիրքորոշումներ են եղել: Դա սովետական Հայաստանի դիրքորոշումն էր, որ Ղարաբաղը Հայաստանի անբաժանելի մաս էր: Դիրքորոշումները փոխվում են»:
Կարդացեք նաև
Աշոտ ԻՍՐԱԵԼՅԱՆ
