«Նավթի գների անկման պատճառով Ադրբեջանը հասկանում է, որ այս ամառը եւ աշունը իր վերջին հնարավորությունն է պատերազմ սկսելու: Երկար ժամանակ նա այդքան գումար չի ունենա, որպեսզի պատերազմի եւ այդ պատճառով նա ցանկանում է օգտագործել այս հնարավորությունը»,- այս կարծիքն այսօր «Մեդիա կենտրոնում» «Լարվածության նոր փուլ հայ-ադրբեջանական սահմանին և ղարաբաղյան հակամարտության գոտում» թեմայով քննարկմանը հայտնեց Քաղաքական եւ միջազգային հետազոտությունների հայկական կենտրոնի տնօրեն Աղասի Ենոքյանը:
Պարոն Ենոքյանը նաեւ նշեց, որ Ադրբեջանն այժմ կողմ է հակամարտության գործում խաղաղապահներ տեղակայելուն. «Մենք գիտենք, որ երկար ժամանակ Ադրբեջանը դեմ էր դրան: Այժմ նա հասկանում էր, որ կարող է Ռուսաստանի ձեռքերով Ղարաբաղից կտոր պոկել եւ նրա համար պարզ է, որ Ռուսաստանի զորքերը այնտեղ երկար ժամանակ չեն մնա: Մյուս կողմից` Ռուսաստանը նույնպես այժմ հետաքրքրված է հակամարտության սրացմամբ, քանի որ մենք տեսնում ենք, որ նա սառեցրել է Դոնբասի հակամարտությունը եւ լուրջ գործունեություն է սկսել Սիրիայում եւ Հարավային Կովկասում ու կարող է սահմանափակ զորքեր տեղակայել Ղարաբաղում: Դա նրանից մեծ միջոցներ չի պահանջի»:
Ռազմավարական եւ ազգային հետազոտությունների հայկական կենտրոնի ղեկավար Մանվել Սարգսյանն էլ կարծում է, որ պետք է հասկանալ այս քաղաքականության տրամաբանությունը. «Ադրբեջանն, իմ կարծիքով, իր դիրքորոշումը չի փոխել: Այսինքն` բոլոր այս տարիներին նա ամեն ինչ արել է, որպեսզի բոլորին ստիպի ընդունել իր դիրքորոշումը: Դա երբեք չի փոխվել: Փոխարենը փոխվել են միջոցները»:
Նա նաեւ նշեց, որ Ռուսաստանի հետ հարաբերությունները սերտացումը, զենք գնելը պետք է բերեր նրան, որ Ադրբեջանն ավելի ակտիվորեն սկսել օգտագործել ծանր զինատեսակները եւ «դրանով ցույց տար ամբողջ աշխարհին, որ սա է այն ուղղությունը, որոնցով իրենք գնում են: Վերջին ելույթները Ադրբեջանից ցույց են տալիս, որ նա չի հեռանա այդ գծից: Նրա նպատակը ստատուս քվոն վերացնելն է»:
Կարդացեք նաև
Քննարկմանը Լոնդոնից տեսազանգի միջոցով միացած Հանուն միջազգային խաղաղության Կարնեգի հիմնադրամի վերլուծաբան Թոմաս դե Վալը ասաց, որ չի տեսնում հայկական կամ ադրբեջանական կողմերի հետաքրքրվածությունը լայնամասշտաբ հակամարտություն սկսելու համար. «Հայկական կողմի դեպքում դա հասկանալի է, որ ստատուս քվոն համապատասխանում է նրանց հետաքրքրություններին: Ադրբեջանական կողմի համար մեծ վտանգ է լայնամասշտաբ ռազմական գործողություններ սկսելը: Ես չեմ կարծում, որ նրանց ռազմական ներուժը այնքան մեծ է, որ պատերազմ սկսեն եւ անհասկանալի է, թե ինչպես կարձագանքի Ռուսաստանը»:
Ըստ վերլուծաբանի՝ հակամարտության իրավիճակը, ընդհանուր առմամբ, վատթարանում է: Նա նկատի ունի սահմանին զինատեսակների ավելացումը եւ ծանր զենքերի կիրառումը: «Դա շատ վատ է եւ կա վտանգ, որ հանկարծ ինչ-որ վատ իրադարձություն կլինի շփման գծում եւ տասնյակ մարդիկ կզոհվեն»:
Աշոտ ԻՍՐԱԵԼՅԱՆ
