Երևանի Շենգավիթ վարչական շրջանի ընդհանուր իրավասության դատարանն այսօր կրկին չհրապարակեց փաստաբան Նիկոլայ Բաղդասարյանի բողոքի վերաբերյալ որոշումը:
Հիշեցնենք, որ նախորդ անգամ էլ դատարանը չհրապարակեց որոշումը, որովհետեւ դատական նիստին ներկա չէր դատախազը:
Պաշտպանական կողմը այսօր դատարանից ժամանակ խնդրեց, որ բողոքի վերաբերյալ լրացուցիչ հիմնավորումներ ներկայացնի: Նիկոլայ Բաղդասարյանի պաշտպան Սամվել Ջաղինյանը ներկայացրեց պաշտպանական կողմի տեսակետը՝ ասելով, որ բողոքի քննության ընթացքում պարզել են, որ քրեական գործի հարուցման որոշումն անօրինական է եղել. «Դատարանը կաշկանդված չէ այս գործի շրջանակներում հայտնաբերված ենթադրյալ օրինախախտման վերաբերյալ դիրքորոշում հայտնել»:
Հիշեցնենք, որ փաստաբան Նիկոլայ Բաղդասարյանին քրեական օրենսգրքի 144-րդ հոդվածով, այն է՝ անձնական կամ ընտանեկան կյանքի մասին տեղեկություններ ապօրինի հավաքելը, պահելը, օգտագործելը կամ տարածելը, մեղադրանք է առաջադրվել:
Կարդացեք նաև
Պարոն Բաղդասարյանի պաշտպան Լուսինե Սահակյանն էլ ասաց, որ. «Եթե Նիկոլայ Բաղդասարյանը որեւէ պատասխանատվության ենթարկվի իր մասնագիտական գործառույթն իրականացնելու համար, իր լիազորությունն իրականացնելու համար, շատ լուրջ խնդիր կլինի փաստաբանների համար: Սա համարում եմ լուրջ մարտահրավեր փաստաբաններին: Սա Նիկոլայ Բաղդասարյանի գործը չէ, սա մեր բոլորի գործն է, որովհետեւ մենք մեր պարտականությունները պետք է կատարենք պատշաճ, իսկ դատախազությունը Նիկոլայ Բաղդասարյանին հետապնդում է իր պարտականությունները պատշաճ կատարելու համար»:
Հաջորդ դատական նիստը հոկտեմբերի 15-ին է:
Արփինե ՍԻՄՈՆՅԱՆ
