Հենրիկ Մալյանի անվան կինոդերասանի թատրոնում այսօր հանդիսատեսին ներկայացվեց Արթուր Բախտամյանի «Չարտասանված Նոբելյան ճառեր» ֆիլմաշարը, որը ներկայացնում է արևմտահայ 4 նահատակ մտավորականների՝ Գրիգոր Զոհրապի, Դանիել Վարուժանի, Սիամանթոյի և Ռուբեն Սևակի ենթադրյալ Նոբելյան ճառերը` հեղինակների կենսագրական և ստեղծագործական փաստերի, նրանց ապրած ժամանակի, իղձերի ու հիասթափությունների ճշգրիտ վավերական հիմքերով. «Այդ մարդկանց կյանքը միաժամանակ ընդհատվեց 1915թ-ին: Համաշխարհային մշակույթն այդպես էլ չլսեց այդ մարդկանց, չնայած նրանց ստեղծագործությունները թարգմանվել են անգամ օսմաներեն»,-Aravot.am-ի հետ զրույցում ասաց ռեժիսորը:
Նկարահանումներն իրականացվել են Արևմտյան Հայաստանում՝ գրողների ծննդավայրերում. «Այդ ժամանակ Թուրքիայում խորհրդարանական ընտրություններ էին տեղի ունենում: Այդ միջավայրում որեւէ նկարահանում անելիս ակամայից հայտնվում ես ինչ-որ անհասկանալի ճամբարում: Նկարահանող խմբի համար էքստրեմալ էր, միաժամանակ՝ վտանգավոր, քանի որ այն ինչ անում էինք, կարող էր առհասարակ չլինել: Այդ երկիրն աչալուրջ է բոլոր տեսախցիկների հանդեպ եւ հատկապես այդ օրերին հայկական անձնագրով մուտք գործողների հանդեպ»,-պատմեց Բախտամյանը:
Հավելենք, որ «Չարտասանված Նոբելյան ճառեր» ֆիլմաշարը նվիրված է Հայոց ցեղասպանության 100-րդ տարելիցին։ Առաջիկայում կկազմակերպվեն ֆիլմաշարի ցուցադրություններ: Նախատեսվում է այն թարգմանել անգլերեն ու թուրքերեն: Ի դեպ, թուրքերեն կկարդա Օրհան Փամուկը, անգլերեն՝ հավանաբար Մել Գիբսոնը:
Մանրամասները` տեսանյութում
Կարդացեք նաև
Լուիզա ՍՈՒՔԻԱՍՅԱՆ
