«Դելոյթ ընդ Տուշ» ընկերության կազմած հաշվետվությունից ուղղակի «թափվում է» բողոքի ալիք մարելու ցանկությունը եւ ոչ թե սակագնի հիմնավորվածություն ստուգելը։ Մի մեջբերում. «Այնուամենայնիվ, սակագնի հերթական կտրուկ աճը բազմաթիվ բողոքի ցույցերի տեղիք տվեց Հայաստանի մի շարք քաղաքներում։ Ցուցարարները պահանջում էին ՀԾԿՀ-ի որոշման կասեցում՝ սակագնի աճի համար պատասխանատու համարելով հանրապետությունում էներգիայի մոնոպոլ մատակարար ՀԷՑ-ին։ Ընկերության ղեկավարության հասցեին հնչում էին թալանի, կոռուպցիայի մեղադրանքներ, մասնավորապես նշվում էին ներկայացուցչական դասի մեքենաների վարձակալությանը եւ այլ «ճոխություններին» ուղղված չափազանց մեծ ծախսերը։ Առավել ծայրահեղ ակտիվիստները պահանջում էին կառավարության եւ նախագահի հրաժարականը։ Իրադրությունը կայունացնելու նպատակով Հայաստանի Հանրապետության նախագահն առաջարկեց իրականացնել սակագների վերջին վերանայման շրջանակներում ՀԾԿՀ կայացրած որոշումների անկախ փորձաքննություն»։
Շատերին կարող է թվալ, թե սա հատված է որեւէ արտասահմանյան լրատվամիջոցի՝ Հայաստանի մասին ռեպորտաժից։ Բայց ոչ։ Սա հատված է «Դելոյթ ընդ Տուշի» կազմած հաշվետվությունից։ Որքան փնտրեցինք խորհրդատուին ներկայացրած տեխնիկական առաջադրանքում, այդպես էլ չգտանք որեւէ դրույթ, ըստ որի խորհրդատուն պետք է գնահատեր, թե ով ում էր մեղադրում, «առավել ծայրահեղ ակտիվիստները» ում հրաժարականն էին պահանջում…: Ուղղակի ակնհայտ է, որ «Դելոյթ ընդ Տուշի» այս լիրիկական զեղումները պայմանավորված են հենց նրանով, որ այս «խորհրդատուն» նպատակ է ունեցել միայն ու միայն հանրությանը համոզել, որ սակագինը բարձրացնելու մասին ՀԾԿՀ-ի որոշումը հիմնավոր է։
Սա շատ նման է մի իրավիճակի, որ թաղային վեճում մի պատանի, գիտենալով, որ սխալ արարք է թույլ տվել, հրավիրում է իր պատկերացմամբ թաղային մի հեղինակության, որը մյուս բոլոր պատանիների մոտ սկսում է համոզել, որ իր «պաշտպանյալը» ճիշտ է։ Բայց քանի որ հիմնավորումները այնքան էլ համոզիչ չեն, թաղային հեղինակությունը սկսում է զեղումներ, «ճշտի ու սխալի» մասին «գաղափարական» տրակտատներ արտասանել, առանց բուն թեմային անդրադառնալու:
Հայկ ԳԵՎՈՐԳՅԱՆ
Կարդացեք նաև
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
