Մոտ մեկ ամիս առաջ «Յուքոմ» ընկերությունը հայտարարեց «Օրանժ» ընկերությունը գնելու մասին։ Երեկ էլ հայտարարվեց, որ «Տաշիր գրուպ» ընկերությունների խումբն «ամբողջությամբ իր վրա է վերցնում «Հայաստանի էլեկտրական ցանցերի» կառավարումը» եւ պատրաստվում է ձեռք բերել «Ինտեր ՌԱՕ» ընկերության էլեկտրաէներգետիկ ակտիվները Հայաստանում։ Անգամ պայմանագիր է կնքվել։
Տնտեսագետները դեռ կվերլուծեն այս փաստերը, շարքային քաղաքացիները կքննադատեն, բիզնեսմենները կնախանձեն, սակայն մի բան պարզ է, որ մեր ռազմավարական հարստությունները վերադառնում են մեզ։ Եթե անգամ ոչ պետությանը, ապա՝ հայազգի գործարարներին, ինչը չի կարելի չողջունել։ Ոմանք, անշուշտ, կառարկեն՝ ի՞նչ տարբերություն, թե ով է մեզ հարստահարում եւ ով է փող աշխատում մեր հաշվին։ Բայց վստահ եմ, որ սա առաջին քայլն է՝ ազգայնացման պրոցեսի սկիզբը, հաջորդը լինելու է պետականացումը։ Եվ հետագայում շատ ավելի հեշտ է լինելու կապն ու էլեկտրական ցանցերը, մյուս ռազմավարական հարստությունները պետությանը վերադարձնելը, քանզի հայազգի բիզնեսմենների հետ հնարավոր է լինելու «լեզու գտնել», պայմանավորվել, վերջապես՝ համոզել:
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
