Հայաստանի պետական կամերային երգչախումբը (գեղարվեստական ղեկավար եւ գլխավոր դիրիժոր` Ռոբերտ Մլքեյան) հոկտեմբերի 3-ին հանդես կգա Հունաստանում՝ Եվրոպայի լավագույն համերգասրահներից մեկում՝ «Մեգարոնում»: Համերգը Հայոց ցեղասպանության 100-րդ տարելիցի միջոցառումների շրջանակում է: Այս մասին Aravot.am-ին տեղեկացրեց Հայաստանի պետական կամերային երգչախմբի տնօրեն Արմեն Արաբյանը: Պարոն Արաբյանը հայտնեց, որ ծրագրում, ի թիվս այլ ստեղծագործությունների, նախատեսված է Շնիկե, Շուբերտ, Մլքեյանի ջազային մշակումները, Կոմիտաս եւ Դավիթ Հալաջյան:
«Աթենքի «Մեգարոնը» մեզ համար արդեն բարձր նշաձող է ու մեծ հեղինակություն: Համերգի կայացմանն աջակցել է Հունաստանում Հայաստանի դեսպանատունը, բայց կազմակերպիչները հենց հունական կողմից են: Ի միջիայլոց, «Մեգարոնը» մինչեւ չի ուսումնասիրում երաժիշտների ուղնուծուծը, չի համաձայնում իր հարկի ներքո հյուրընկալել»,-հայտնեց երգչախմբի տնօրենը: Արեն Արաբյանը հավելեց, որ կազմակերպել են նաեւ երկու համերգ Սալոնիկում՝ հայ համայնքի համար հոկտեմբերի 4-ին, հունական համայնքի համար՝ հոկտեմբերի 5-ին: «Մեզ համար շատ կարեւոր է, որ ավելի լայն լսարանին հաղորդակից դարձնենք մեր երգչախմբի արվեստին»,-ասում է մեր զրուցակիցը:
Գոհար ՀԱԿՈԲՅԱՆ
Լուսանկարը՝ Կամերային նվագախմբի armchoir.com կայքից:
