Ադրբեջանի նախագահ Իլհամ Ալիեւն այսօր ընդունել է Հարավային Կովկասում Եվրամիության հատուկ ներկայացուցիչ Հերբերտ Սալբերի գլխավորած պատվիրակությանը։ Այս տեղեկությունը հաղորդել է «Trend»-ը:
Սալբերը ասել է, որ իր այցելությունը լավ հնարավորություն է ԵՄ-ի եւ Ադրբեջանի հարաբերությունների ներկա վիճակը, ինչպես նաեւ տարածաշրջանային հակամարտությունները քննարկելու համար:
Ալիեւը նշել է, որ Հարավային Կովկասում Եվրամիության հատուկ ներկայացուցչի Ադրբեջան կատարած վերջին այցից հետո տարածաշրջանում եւ աշխարհում մի շարք իրադարձություններ են տեղի ունեցել:
Անդրադառնալով Լեռնային Ղարաբաղի հակամարտությանը՝ Ալիեւն ասել է, որ դրա կարգավորումը տարածաշրջանային կայունության գլխավոր գործոններից մեկն է: Նա կարծիք է հայտնել, որ Հայաստանի նպատակը բանակցային գործընթացը ձգելը ու ստատուս քվոն պահպանելն է: Ալիեւը երկարաժամկետ ստատուս քվոն անընդունելի է համարել:
Կարդացեք նաև
Խոսելով շփման գծում տեղ գտած վերջին զարգացումների մասին՝ Ադրբեջանի նախագահը Հայաստանին մեղադրել է իր երկիրը սադրանքի մեջ ներքաշելու համար: Նա ավելացրել է, որ միջազգային միջնորդները լուրջ չեն ընդունում այս հակամարտությունը:
Պատրաստեց Աշոտ ԻՍՐԱԵԼՅԱՆԸ
