«Վերջին մի քանի տարիներին օգոստոս-սեպտեմբեր ամիսները այն ժամանակաշրջանն են, երբ հակամարտության գոտում իրավիճակը կտրուկ սրվում եւ երկու կողմերից էլ հրադադարի ռեժիմը խախտվում է: Այս սրացման հստակ պատճառը որոշելը բարդ է. այս հակամարտությունը սառած չէ, այն ուղղակի խլացված է»,- այս կարծիքը, ըստ «Ria»-ի, հայտնել է Կովկասի հարցերով փորձագետ Կոնստանտին Տասիցը:
Ըստ նրա՝ այդ պատճառով, չնայած նրան, որ ռազմական գործողությունները լայնամասշտաբ չեն վերսկսվել, սակայն զանգվածային խախտումներ ամեն դեպքում լինում են: Նրա կարծիքով՝ ռազմական գործողությունների վերսկսման մեջ կարող են միայն հակամարտության կողմերը:
«Արտաքին ուժերը հստակ ցույց են տալիս, որ հետաքրքրված չեն հակամարտության լարման մեջ: Առաջին հերթին հետաքրքրված է Ադրբեջանը, քանի որ նրան անհրաժեշտ է փոխել ստատուս-քվոն, նրան ձեռնտու չէ ներկայիս իրավիճակը: Հայաստանը չի կարող անուշադրության մատնել այն կրակոցները, որոնք տեղի են ունենում եւ ստիպված է պատասխանել: Եվ դա շղթայական արձագանք է տալիս»,- կարծում է փորձագետը:
Նրա խոսքերով՝ լայնամասշտաբ պատերազմի հավանականությունը պահպանվում է. «Եթե լարվածությունը դուրս է գալիս վերահսկողությունից, արտաքին խաղացողներն են խառնվում. Ռուսաստանը կամ Մինսկի խմբի անդամներ կարող են ճնշում գործադրել երկու կողմերի վրա, որպեսզի լարվածությունը նվազի: Երկու կողմերն էլ զինված են, պատրաստվում են պատերազմի, այդ պատճառով իրավիճակը կարող է վերահսկողությունից դուրս գալ»:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
