«Ինձ համար մեր արտգործնախարարի վարքը խիստ տարօրինակ է»
«ՌԴ-ն կարող է ամբողջ աշխարհին վախեցնել, ասել՝ կտամ մռութդ կջարդեմ, է՞, հետո՞»,- այսօր «Անալիտիկ» ակումբում «Մոդուս Վիվենդի» վերլուծական կենտրոնի ղեկավար Արա Պապյանն անդրադարձավ ՌԴ-ի վարած քաղաքականությանը: Նա քննադատեց ՌԴ-ին, որ իրեն ռազմավարական դաշնակցի նման չի պահում, զենք է վաճառում հակամարտող գոտում մեր հակառակորդին, ինչը հրահրում է իր դեմ ՀՀ քաղաքացիներին:
Մեր դիտարկմանը, որ ՀՀ ԱԳ նախարար Էդվարդ Նալբանդյանը հայտարարեց, որ ՌԴ-ն ունի իր բիզնես շահերը, Արա Պապյանն արձագանքեց. «Այդ հայտարարությունը մեկնաբանում եմ որպես անհասկանալի ու անտրամաբանական: Նախ, ՌԴ-ն ունի իր բիզնեսը, թող ինքը պաշտպանի իր բիզնես շահերը, ոչ թե ՀՀ արտգործնախարարը: Նախարարի խնդիրն է, որ տեսնի այն խախտումները, ինչ կա՝ Դաշնակցային հարաբերությունների խախտում, Բիշքեկյան զինադադարի երաշխավորի վարքագծի դեմ գործողություններ, բազմաթիվ խախտումներ կան, ի՞նչ է նշանակում բիզնես շահ: Ես էլ բիզնես շահ ունեմ՝ գնամ Մոսկվայում նարկոտիկ ծախեմ: Ի՞նչ է, պիտի ասեն Պապյանը բիզնես շահ ունի, թող ծախի՞: Հակամարտության գոտում զենք վաճառելը միջազգային նորմի խախտում է: Բա մյուս երկրները բիզնես շահ չունե՞ն, որ չեն ծախում: Ինձ համար մեր արտգործնախարարի վարքը խիստ տարօրինակ է»:
Ինչ վերաբերում է ՀՀԿ-ականների արդարացումներին, որ ՌԴ-ն մեզ արտոնյալ պայմաններով է տալիս՝ գործարանային գներով, Արա Պապյանն ասաց. «Մեզ ՌԴ-ն պարտավոր է արտոնյալ պայմաններով, անգամ անվճար տալու, որովհետեւ ինքը մեր դաշնակիցն է: Իսրայելին ԱՄՆ-ն տարեկան 4 մլրդ դոլարի հակաօդային պաշտպանական միջոցներ է տալիս անվճար: Եթե ՌԴ-ն չլիներ մեր դաշնակիցը, այլ լիներ Ադրբեջանի՝ խնդիր չկար: Բայց նա մե՛ր դաշնակիցն է»:
Կարդացեք նաև
Մեր հարցին՝ այս պահին ՌԴ-ն ունի՞ շահ սահմանային լարվածությունը մեծացնելու հայ-ադրբեջանական սահմանում, որովհետեւ կա տեսակետ, որ ՌԴ-ն արդեն 2 պատերազմ շալակել է եւ 3-րդ պատերազմը չի ուզենա շալակել, Արա Պապյանը պատասխանեց. «ՌԴ-ն ունի որոշ շահ: Դրանով ինքը սիրաշահում է Ադրբեջանին, փորձում է ավելի լավ հարաբերություն ստեղծել եւ գայթակղել դեպի ԵՏՄ: ՌԴ-ն ձգտում է ինչ-որ ձեւով վերականգնել Սովետական միությունը: Կարո՞ղ է ՌԴ-ն դառնա գերտերություն՝ ոչ: Գերտերության դեր ստանձնելու միակ հնարավորությունը ռազմական կոնֆլիկտներն են»:
Հռիփսիմե ՋԵԲԵՋՅԱՆ
