1191 եւ 1194 թվականներին Դերջանի (Արեւմտյան Հայաստան) Ապարանից Սբ. Դավիթ վանքում Տեր Սահակի եւ Հովհաննես կրոնավորի տեսիլքով կերտվել են երկու եզակի խաչքարեր, որոնք կանգուն են ցայսօր:
Ն.Ս.Օ.Տ.Տ. Գարեգին Բ Ամենայն հայոց կաթողիկոսի օրհնությամբ Մայր Աթոռ Սուրբ Էջմիածնում այսօր տեղի ունեցավ այդ խաչքարերի կրկնօրինակների բացման արարողությունը:
Կարդացեք նաև
7 մետր երկարությամբ եւ 12 տոննա կշռող բացառիկ հուշարձանների հեղինակը խաչքարագործ Լյուդվիգ Ղազարյանն է: 40 տարի քարից արվեստի գլուխգործոցներ կերտող վարպետը լրագրողների հետ զրույցում նշեց, որ կոթողներն աշխարհի ամենաբարձր եւ մեկ կտոր քարից կերտված միակ խաչքարերն են, իսկ Արեւմտյան Հայաստանում գտնվող բնօրինակների բարձրությունը 4 մետր է. «Քարաբեկորները երկար էին, կոտրվելու վտանգ կար, բայց աստծո կամոք ամեն ինչ բարեհաջող ընթացավ: Քանի որ քարերը մեծ էին, սկզբում դրանք տեղադրեցինք, հետո նոր արհեստանոցս կառուցվեց: Վերջացնելուց հետո էլ առաստաղը քանդեցինք, որպեսզի խաչքարերը դուրս բերվեին»,-պատմեց Լյուդվիգ Ղազարյանը:
Հայոց ցեղասպանության զոհերի հիշատակին նվիրված խաչքարերը քողազերծեցին բարերարները, ինչից հետո Ամենայն հայոց կաթողիկոսն օծեց դրանք սրբալույս մյուռոնով:
Մանրամասները` տեսանյութերում:
Լուիզա ՍՈՒՔԻԱՍՅԱՆ
