Սեպտեմբերի 28-ին Peoplemeter մամուլի ակումբում Բորոդինի անվան լարային քառյակի անդամների ու թավջութակահար Ալեքսանդր Չաուշյանի ասուլիսը չկայացավ:
Հայաստանի ազգային ֆիլհարմոնիկ նվագախմբի գլխավոր պրոդյուսեր Արման Պադարյանը լրագրողներին տեղեկացրեց, որ պատճառը ֆորս-մաժորային իրավիճակն է, որի արմատները ստեղծագործական են: Նրա ձեւակերպմամբ, անվանի քառյակը ստիպված էր ասուլիսը տեղափոխել փորձերի պատճառով եւ համերգին հավուր պատշաճի ներկայանալու համար:
Հիշեցնենք, որ Բորոդինի անվան քառյակին հյուրընկալել է Հայաստանի ազգային ֆիլհարմոնիկ նվագախումբը՝ սեպտեմբերի 10-ից մեկնարկած Երեւանյան 9-րդ միջազգային փառատոնի շրջանակներում: Փառատոնը նվիրված է Ազգային ֆիլհարմոնիկի 90-ամյակին եւ Հայոց ցեղասպանության 100-րդ տարելիցին:
Համերգին, որ կկայանա սեպտեմբերի 30-ին, Բորոդինի քառյակի հետ հանդես կգա ճանաչված թավջութակահար Ալեքսանդր Չաուշյանը (Մեծ Բրիտանիա)՝ կատարելով Շուբերտի Թավջութակի կվինտետը: Կհնչեն նաեւ Չայկովսկու թիվ 1 Կվարտետը եւ Ռուբեն Մարգարյանի Epilogue լարային կվարտետը:
Կարդացեք նաև
1945-ին հիմնադրված Բորոդինի քառյակի ներկայիս կազմում են՝ Ռուբեն Ահարոնյանը (առաջին ջութակ), Սերգեյ Լոմովսկին (ջութակ), Իգոր Նայդինը (ալտ), Վլադիմիր Բալշինը (թավջութակ): Քառյակն իր գոյության 70 տարիների ընթացքում 6000-ից ավելի համերգներ է ունեցել աշխարհով մեկ:
Գոհար ՀԱԿՈԲՅԱՆ
