«Գուցե շատերը մոռացել են, բայց ավելի վաղ նախատեսվել էր նաեւ, որ ՀՀ տարածքում է գործելու ՀԱՊԿ ակադեմիան, որի ռեկտոր էր նշանակվել, եթե չեմ սխալվում, Արթուր Բաղդասարյանը: Անգամ շենքի շինարարությունն էր սկսվել ու անավարտ թողնվել Երեւանի վթարված ճոպանուղու հարեւանությամբ: Չի բացառվում, որ ՀՀ գործող ղեկավարությունն այս կերպ փորձում է բարձրացնել երկրի պաշտպանունակությունը, բայց, չցանկանալով անտեղի ենթադրությունների դաշտը մտնել, կառաջարկեի այդ հարցը տալ անձամբ պարոն Սարգսյանին»,- «Առավոտի» հետ զրույցում ասաց ԼՂՀ նախկին արտգործնախարար Արման Մելիքյանը` պատասխանելով հարցին, թե ինչի՞ համար էր Սերժ Սարգսյանն առաջարկում ՀԱՊԿ-ի խաղաղապահ ստորաբաժանում ունենալ:
Հիշեցնենք՝ օրերս Դուշանբեում կայացած ՀԱՊԿ գագաթնաժողովի ժամանակ ՀՀ նախագահ Սերժ Սարգսյանն ասաց, որ ՀԱՊԿ խաղաղապահներ նախապատրաստելու համար բազային կազմակերպություն ստեղծելու պահը հասունացել է, ու 2016-ին` ՀԱՊԿ-ում իր նախագահության շրջանում, Հայաստանը խաղաղարարական արշավներին մեծ ուշադրություն կդարձնի:
«Առավոտ» օրաթերթ
26.09..2015
