Սեպտեմբերի 26-ին Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի 6-րդ նիստի ընթացքում ՀՀ նախագահ Սերժ Սարգսյանը նշել է, թե երբ մենք ասում ենք, որ պատերազմից վախենում ենք, բայց կռվելուց չենք վախենում, դատարկ խոսքեր չեն. «Հայաստանը, իսկ երբ ես ասում եմ Հայաստանը՝ Լեռնային Ղարաբաղը նրա անբաժան մասն է, երկրագնդի ամենառազմականացված տարածքներից են: Գիտեք, որ դեռ մեր պապերն են ասել՝ կռվի մեջ փլավ չեն բաժանում»:
Այս հայտարարությանն այսօր արձագանքել է Ադրբեջանի արտաքին գործերի նախարարության խոսնակ Հիքմեթ Հաջիեւը: «Հայաստանի իշխանության «Լեռնային Ղարաբաղը Հայաստանի անբաժան մասն է» հայտարարությունը Ադրբեջանական հողերի օկուպացիայի հաջորդ ապացույցն է: Սա նաեւ այդ երկրի իրավական եւ քաղաքական պատասխանատվությունն է եւ Հայաստանի իրական դեմքը»,- ասել է նա:
Նա նաեւ նշել է, որ Լեռնային Ղարաբաղի շուրջ ընթացող բանակցությունների ընթացքում նման հայտարարությունը «անպատժելիության սինդրոմի, անօրինականության, միջազգային իրավունքին, ՄԱԿ-ի կանոնադրությանը, ՄԱԿ-ի անվտանգության խորհրդի համապատասխան բանաձեւերին, բանակցային գործընթացին եւ միջազգային հանրությանը անհարգալից վերաբերմունքի օրինակ է»:
Պատրաստեց Աշոտ ԻՍՐԱԵԼՅԱՆԸ
Կարդացեք նաև
